Publiká riba 01 Novèmber 2021
Willemstad – Di 4 te ku 8 di novèmber próksimo, e barku Statraad Lehmkuhl ta di bishita den haf di Kòrsou. Statsraad Lehmkuhl ta un barku di investigashon di 107 aña bieu, prosedente di Noruega. Na luna di ougùstùs último, Statraad Lehmkuhl a sali for di Noruega riba un biahe di 55.000 mia nóutiko kual lo pasa na 36 diferente haf mundialmente, inkluso nos Bahia di Santa Ana. Na luna di aprel 2023, Statsraad Lehmkuhl lo yega bèk Noruega.
E barku akí, ta enkargá na hasi investigashonnan sientífiko den diferente teritorio oseániko pa generá dato nobo riba entre otro kambionan klimatológiko, polushon i kontaminashon, problema di microplástiko, i ‘verzuring’ den oséano. Resultado di e investigashonnan akí, ta sirbi pa entre otro krea mas konsientisashon i alsa konosementu tokante dikon ta krusial pa hasi uso di nos oséanonan di forma duradero; tur esaki, for di un perspektiva internashonal. Pa por logra e investigashonnan akí, Statsraad Lehmkuhl ta ekipá ku aparatonan ultramoderno i un tim di sientífikonan multidisiplinario ku kontinuamente ta kompilá datonan di tantu e físika, kímika, komo tambe e biologia di nos oseánonan.
Durante di e bishita di Statsraad Lehmkuhl na Kòrsou, e tim di sientífiko lo kondusí investigashonnan sientífiko den nos awanan teritorial, pero tambe lo tin e espasio pa nan relahá i konosé e kultura riku di nos pais. Tambe mas ku klaro, lo krea oportunidatnan úniko pa establesé momentunan di kontakto entre e sientífikonan na bordo i nos propio instansianan lokal di moda ku Kòrsou por probechá lo máksimo di e konosementu akí, tantu pa práktikanan den futuro komo manehonan ku ainda mester keda desaroyá. Resultadonan di e investigashon ku keda hasí den nos awanan teritorial dor di Statsraad Lehmkuhl, lo tin un kontribushonnan positivo na interkambio di datonan i konosementu sientífiko riba nivel nashonal i internashonal. Diferente instituto i organisashon lokal, manera entre otro Carmabi, lo por saka gran benefisio for di e resultadonan di e investigashon akí. Un siman despues di e bishita di Statsraad Lehmkuhl aki, Su Mahestat Rei Willem Alexander i Reina Maxima lo hasi un bishita ofisial na Noruega kaminda entre otro lo deliberá resultadonan di nan bishita na Kòrsou.
Yegada di Statsraad Lehmkuhl na Kòrsou ta keda kordiná pa Gobièrnu di Kòrsou, huntu ku Blue Ribbon Committee, ku ta enkargá ku implementashon di e maneho di oséano di Kòrsou, Climate Change Committee Curaçao, i Curaçao Sustainability Coalition.
Yegada di Statsraad Lehmkul lo ta djaweps awor, 4 di novèmber pa aproksimadamente 10or di mainta i e lo mara na Matheywerf. Durante di e estadia, e delegashon lo hasi un bishita di kortesia serka Gobernador di Kòrsou, i nan lo bishitá Carmabi su instalashonnan i e ‘Substation’. Lo tin posibilidat pa públiko bishita e barku riba djasabra 6 di novèmber di 12or pa 3or di atardi na Matheywerf. Protokòlnan relashoná ku COVID-19 ta aplikabel.
