Publiká riba 22 Mei 2020
Willemstad 22 di Mei 2020- Lamentablemente e periodo pa por apliká pa e supsidio pa salario a kuminsa sigur un siman mas lat ku a planiá, pa motibu ku tabata nesesario pa promé risibí aprobashon di Konseho di Minister di Reino tokante e finansiamentu. Entrante Djasabra 23 di Mei 6’or di atardi, e dunadó di trabou por entregá nan petishon durante sinku (5) dia (pues te ku Djaweps pa 28 di Mei 6’or di atardi).
Esnan ku a risibí supsidio pa salario pa luna di Aprel, lo risibí un e-mail ku lo kontené un URL-link.
Pa medio di e link aki nan lo por apliká aun mas fásil. Pa loke ta trata otro kompanianan, nan por entregá nan petishon nobo via e portal.
A base di e konseho di Cft, Hulanda a disidí pa fiha un kondishon na finansiamentu di e areglo, kual ta ku e dunadó di trabou ta aportá ku 20% na e sosten. Esaki ta pone ku e partishon di gastu pa loke ta trata e medida ta resultá den 60% pa gobièrnu, 20% pa dunadó di trabou i 20% pa empleado. Pues e supsidio pa salario ta baha ku 20%.
Pa por kubri e diferensha, ta hasi un yamada na empleadonan i dunadónan di trabou pa konsultá i drenta un areglo pa temporalmente baha e salario bruto, i/òf entregá dia di fakansi, sèn di fakansi i otro tipo di rekompensa, pa empleadonan kontribuí na un kompensashon ku ta igual na 20% di nan salario bruto, riba kua ta paga supsidio di salario. Na e petishon e aplikadó mester añadí ku a yega na e palabrashon a base di un akuerdo mutuo ku e empleado. Si, ku aprobashon mutuo, por pasa pa un bahada di suèldu, esaki mester tuma lugá na mes manera ku ta apliká e ‘ziektewet’. Lo baha tur komponente di e salario bruto (pues ku esaki tambe tur retenshon koherente na e komponente), menos e prima di ZV/OV i e suèldu di ZV/OV. Pa medio di e sistema aki ta evidente ku, similar ku e Ziektewet, e ahuste ta unu temporal. Riba wèpsait tin un ehèmpel di kon esaki ta funshoná.
Sinembargo mester protehé esnan ku e salario mas abou, i pa e motibu aki no por baha e salario bruto di empleadonan den servisio fiho i full-time bou di e suèldu mínimo (ANG 1.667,-), i alabes e dunadó di trabou ta komprometé su mes na e akuerdo pa tene e empleadonan registrá na SVB ku ta traha warda tambe den servisio, i paga nan segun e suèldu registrá. Pa hasi esaki posibel lo otorgá na salarionan bruto ku ta yega te na ANG 1.047,- pa luna, un supsidio di salario ku ta igual na e salario bruto inkluso e gastunan ku e dunadó di trabou ta kubri, pues riba esaki lo konta un supsidio
di suèldu mínimo di ANG 1.298,- pa luna.
Durante e promé periodo di aplikashon a bin na kla ku un gran kantidat di kompania no tin nan informashon korektamente registrá na SVB, i konsekuentemente nan suèldu total di SVB riba 28 di Febrüari ta (signifikantemente) mas abou ku e suèldu total di OV riba kua nan ta paga e prima di OV.
Esaki a resultá den resibu di un montante mas abou pa e kompanianan aki, pa loke ta trata e e supsidio di salario ku nan a spera. For di luna di Mei SVB lo fiha e montante di supsidio di salario a base di e suèldu total menshoná den e deklarashon di OV pa e lunanan Febrüari i Mart; I aplikantenan mester añadí un dokumento ku informashon di nan empleadonan. Pa luna di Aprel e kompanianan ku a mèldu na e Helpdesk di SVB kisas lo por risibí un adishon. SVB ta pidi boso komprenshon pa e parti atministrativo, kual por tuma algun tempu.
E Lista di Sektor ku a apliká pa e luna di Aprel no a kambia. Solamente a hisa e mínimo di pèrdida di 25% pa 40%, pasobra ta asumí ku e kompanianan mester por logra yega na un entreda mas haltu, dor ku pa un gran parti a baha e medidanan di lock-down.
Manera a enfatisá anteriormente, e kondishon pa por apliká pa e supsidio di salario pa luna di Mei, ta pa paga e salarionan, impuesto di suèldu i primanan sosial segun e palabrashonnan laboral eksistente.
Pa por kontrolá esaki e dunadó di trabou, huntu ku e petishon, tambe mester entregá e payroll i e prueba di pago pa loke ta trata e salarionan pa luna di Aprel. Lo kontrolá e deklarashon i pago di impuesto di suèldu i di e primanan sosial digitalmente. Solamente kompanianan ku ta entregá nan deklarashon manual òf ku a drenta un areglo di pago, mester añadí nan prueba di pago òf e areglo di pago komo anekso digital. Kompanianan ku pa luna di Aprel no a paga salario, impuesto di suèldu i primanan pa e luna di Aprel, no ta bini na remarke pa risibí supsidio di salario pa luna di Mei.
Na momentu ku habri e portal pa por apliká pa e areglo (Djasabra 23 di Mei 6’or di atardi) te na e momentu ku esaki sera, kompanianan ku no ta akuerdo ku a rechasá nan petishon a base di e Lista di Sektor, òf pasobra e kompanianan ta apliká un variashon di periodo di referensia di entrada òf informashon, por tuma kontakto ku e Helpdesk; now@fondodisosten.org. Entrante 29 di Mei tur esnan ku a apliká i risibí afirmashon ku nan petishon ta den proseso, por tuma kontakto ku e Helpdesk di SVB, pa risibí informashon tokante e status di nan petishon.
Kambionan importante kompará ku luna di Aprel:
