Notisia

WILLEMSTAD- Kuerpo Polisial di Kòrsou, konosí komo Korps Politie Curaçao (KPC), den kolaborashon ku Curaçao Airport Holding (CAH),  a kulminá un proseso di 4 aña pa oumentá seguridat di frontera na aeropuerto. Riba 16 di desèmber 2020, despues di un aña kompletu di tèst mei mei di e Pandemia mundial COVID-19, ta lansá ofisialmente den produkshon i ta bibu e asina yamá Advanced Passenger Information System (APIS).

APIS ta un sistema avansá di informashon di pasahero. CAH a inisiá ku implementashon di APIS despues di konsiderá e importansia di seguridat di pais Kòrsou i su aeropuerto. APIS ta pèrmití personal di Imigrashon risibí informashon delantá. E ta fasilitá outoridatnan hudisial pa kondusí chekeo di tur informashon relevante promé ku yegada di un avion.

Suministrashon di e informashon aki delantá ta laga e pasaheronan eksperensiá un proseso mas rápido na bali i na e portalnan elektróniko di seguridat di frontera konosí komo eGates. Di e forma aki ta krea un situashon ku ta benefisia tur partido.  E pasaheronan tin benefisio direkto di e oumento di seguridat i tempu di proseso mas rápido ora Imigrashon atendé pasaheronan na yegada. Ku e informashon aki, Imigrashon i henter e sistema hudisial ta prepará i ta mihó ekipá pa monitoriá biahe di pasaheronan i garantisá seguridat di nos frontera.

Kompanianan di aviashon ku ta bula pa i di Kòrsou ta obligá legalmente pa kumpli ku e regulashonnan di APIS. KPC Imigrashon i Ministerio di Hustisia ta monitoriá e kumplimentu aki i ta rekerí esaki den akuerdo ku e reglamentunan di Curaçao Civil Aviation Authority. Durante e último 4 añanan CAH a kordiná e programa den kolaborashon ku Ministerio di Hustisia pa realisá implementashon di APIS komo parti di un trayekto di 4 fase pa mehorá eksperensia di pasahero. A realisá APIS ku ku asistentis i konosemento tékniko di EY i tambe sosten di vários partner lokal manera Curaçao Civil Aviation Authority, Curaçao Airport Partners i otro entidatnan relatá na Hustisia.

E historia di APIS

APIS ta un parti esensial den mehorashon di seguridat i moveshon di pasahero na aeropuerto. Na 2016 Ministerio di Hustisia i CAH a uni forsa pa inová e proseso di imigrashon na aeropuerto. Despues di eksperensiá kehonan eksesivo relashoná ku e ora di espera largu na Imigrashon, CAH a aserká Ministerio di Hustisia ku un plan pa inová digitalisa e proseso di imigrashon. APIS ta parti 2 di un set di 4 projekto di kua CAH tin intenshon di realisá den kolaborashon ku Ministerio di Hustisia. Meta ta pa oumentá seguridat di frontera i inová fasilidat di pasaheronan i na mes momentu garantisá eksperensia rápido i agradabel serka e pasahero.  E promé parti di e proseso tabata digitalisashon di e proseso di Clearance di frontera ku a tuma lugá na 2015-2016 i a kulminá den implementashon di eGates. E di dos fase a enfoká riba oumento di seguridat di frontera dor di konektá ku fuentenan data mundial manera Interpol i APIS i otro basenan ku data Hudisial. E di 3 i di 4 fase ta enfoká riba implementashon di aparatonan pa fasilitá i solushonnan ku ta reformá e manera ku ta atendé ku e proseso di imigrashon di pasaheronan via Kòrsou. Ministerio di Tráfiko, Transporte i Planifikashon Urbano (VVRP) i Ministerio di Desaroyo Ekonómiko a enkargá Ministerio di Hustisia komo doño di APIS ya ku e sistema ta regardá seguridat di frontera di Kòrsou.

CAH ta enfoká riba Mehorashon

E proyekto ta parti di un trayekto mas grandi pa CAH i ta forma parti di un ambishon stratégiko ku ta enfoká riba mehorashon di e fasilidatnan di pasahero durante henter e proseso di yegada. Na 2015 CAH a traha na aliniá e partnernan di aeropuerto p’asina e pasahero tin un mihó eksperensia durante su yegada na Curaçao International Airport. Den e fase aki CAH a deskribí 4 punto di kontakto ku mester atendé i inová. Komo Imigrashon ta e promé punto di kontakto di pasahero ora nan yega Kòrsou e énfasis na promé lugá tabata pa mehorá e proseso di imigrashon di aeropuerto. Ku introdukshon di APIS CAH ta marka un paso importante i ta brinda CAH e posibilidat di kontinuá ku inovashon kompletu di e proseso di yegada. Esaki CAH ta hasi dor di traha ku e partnernan di aeropuerto pa digitalisá e proseso di tuma maleta i esun di Duana. Kombersashon preliminario ku e partnernan aki ya a tuma lugá. Kolaborashon entre Ministerio di Hustisia i CAH ta ser mirá komo e promé paso pa futuro kolaborashon den direkshon di fasilitá e prosesonan serka pasahero. CAH ta keda komprometé su mes pa sigui traha ku Ministerio di Hustisia i tur otro partner di aeropuerto pa garantisá e eksperensia rekerí pa atendé tur pasahero ku ta yega via aeropuerto.

(Potrèt ariba di robes pa drechi: Elbert Sambo (MT KPC), Wilhelmus Ignacio (Direktor CAH), Minister Steven Martina (Minister di Desaroyo Ekonómiko), Minister Quincy Girigorie (Minister di Hustisia), Gerold Daantje (Sektor Direktor di Ministerio di Hustisia)

(Potrèt ariba di robes pa drechi: Elbert Sambo (MT KPC), Luigi Betrian (Hefe di KPC IT)), Wilhelmus Ignacio (Direktor CAH), Priscilla Circkens (Corporate Strategist & Assistant to the Director-CAH) Carlos Rojas (KPC IT) Minister Steven Martina (Minister di Desaroyo Ekonómiko), Elaine Oleana (Technical Program Manager EY), Luis Curiel (KPC), Minister Quincy Girigorie (Minister di Hustisia), Ninotchka Franca (KPC), Kennard Maduro (EY), Gerold Daantje (Sektor Direktor di Ministerio di Hustisia)

APIS

Informashon di API ta informashon di pasahero ku ta rekerí legalmente serka e pais ku ta atendé imigrashon. APIS ta permití instanshanan hudisial kombatí kriminalidat i monitoriá personanan di interes promé ku nan yegada. E sistema ku pais Kòrsou a skohe ta un sistema mundial di seguridat ku CARICOM ta fasilitá. Esaki ta permití Kòrsou keda mantené seguridat di frontera huntu ku otro entidatnan mundial di hustisia i ta permití Kòrsou yuda den e esfuerso mundial pa kombatí trafikashon humano i terorismo.

Siguiente fase di KPC Imigrashon:

Miéntras ta kompletá fase 2, ya a inisiá ku fase 3. Na e inisio di e aña aki a instalá 4 eGates adishonal den e área di yegada. Adishonal na e 4 aki lo instalá 2 eGates mas den e área di salida. Ta antisipá ku e 6 eGates nobonan aki lo ta ful operashonal pa fin di e promé kuartal di 2021. E eGates adishonal ta yuda Imigrashon den prosesamentu di pasaheronan sin tin kontakto direkto ku nan i ta yuda e pasaheronan redusí nan momentu di kontakto na aeropuerto.

(potrèt ariba: Bali di Imigrashon, eGates i eGates nobo den e  sala di yegada di Curaçao International Airport)

(potrèt ariba: Kordinador di e Programa di APIS Sra.Priscilla Circkens di Curaçao Airport Holding dunando un splikashon di e proseso di Go-Live)