Publiká riba 06 Mei 2020
E krísis viral aktual ta sin presedente, tantu sosial komo ekonómikamente. No ta ni nesesario pa splika ku e situashon aki tambe tin implikashonan severo pa seguridat finansiero interno di tur pais. Kriminalnan mes ora a tuma e oportunidat aki pa eksplotá e krisis dor di adaptá nan forma di operashon i/òf desaroyá formanan nobo pa ehersé nan aktividatnan kriminal.
Gruponan di krímen organisá ta notablemente fleksibel i adaptabel i nan kapasidat pa eksplotá e krísis ta nifiká ku nos mester ta konstantemente vigilante i prepará pa rísiko finansiero nobo ku por lanta kabes. Informashon internashonal ta mustra ku mas i mas hende i negoshi ta vulnerabel pa estafa i froude, sekuestro di mail, wèpsaitnan ku ta “clone” i skemanan pa laba plaka.
Di otro banda, na e momentunan aki kaminda tin nesesidat krítiko di alivio pa nos pais, kumplimentu efektivo i un enfoke kontinuo di parti di institutonan finansiero i no finansiero, supervisornan, Financial Intelligence Unit Curaçao (FIU) i órganonan enkargá ku enforsa kumplimentu ku lei riba integridat i seguridat di nos sistema finansiero, lo duna donantenan potensial mas konfiansa ku nan apoyo lo yega serka e benefisiadonan intenshoná.
FIU Curaçao ke strès riba organisashonnan ku tin ku mèldu pa keda vigilante, keda duna atenshon na kumplimentu (‘compliance’) i na mèldumentu di transakshonnan no usual, tambe den tempu difisil aki.
Komo un demonstrashon di e nesesidat di permanesé vigilante, FIU Curaçao ke hala atenshon riba un informe publiká dor di EUROPOL: – Pandemic profiteering -how criminals exploit the COVID-19 crisis (March 2020) -. E ta duna un bista kon delikuentenan ta adapta nan aktonan kriminal na COVID-19. E informe ta basá primeramente riba informashon ku Europol a risibí di estadonan miembro di Union Europeo, pero e tin balor na nivel mundial. Por yega na e informe usando siguiente lenk: https://www.europol.europa.eu/publications-documents/pandemic-profiteering-how-criminals-exploit-covid-19-crisis
Por haña mas informashon tokante FIU Curaçao riba nos wèpsait www.fiucuracao.cw òf manda un e-mail na info@fiucuracao.cw.
