Publiká riba 23 Mei 2023
WILLEMSTAD – Tur 10 kandidato pa risibí e kondekorashon mas haltu di Pais Kòrsou e aña aki, formalmente a bisa ku nan lo aseptá nan Krus di Mérito. Esaki a tuma lugá riba djaluna 22 di mei 2023 durante un seremonia spesial na Landhuis Vredenberg den kuadro di e di 20 edishon di Krus di Mérito. Dia di Bandera, 2 yüli próksimo e nominadonan lo risibí nan Krus di Mérito.
For di aña 2004 Gobièrnu di Kòrsou ta honra máksimal 5 personanan ku a duna un aporte eksepshonal na nos komunidat. E personanan akí ta risibí un kondekorashon, un ‘medaya’ ku yama Krus di Mérito. Esaki ta e kondekorashon mas prestigioso ku un siudadano por risibí di Gobièrnu di Kòrsou. Debí ku e aña aki ta trata di e di 20 edishon di Krus di Mérito, Gobièrnu di Kòrsou a disidí di nominá 10 persona na lugá di 5. Ta trata di suidadanonan ku meresé rekonosementu paso nan a aportá ku nan talento i trabounan na konstrukshon di nos komunidat. E 10 nominadonan pa risibí un Krus di Mérito ta:
1. Joyce Ingrid Marguerite Adoptie-Treurniet
2. Rose Mary Allen
3. Haydee Remigia Clementina
4. Else Marie Eman-Bradshaw
5. Curd Lawrence Evertz
6. Ryan Antony de Jongh
7. Judith Mauris
8. Pedro Herman Narvaez
9. Rignald Sylvestre Recordino
10. Angelina de Ron-Tromp
Komishon Krus di Mérito a selektá e 10 kandidatonan aki for di e mas di 60 petishon ku Sektor di Kultura i Deporte a risibí. Konseho di Minister a aprobá e selekshon. Durante e seremonia na Landhuis Vredenberg, Minister di Enseñansa, Siensia, Kultura & Deporte sr. Sithree van Heydoorn a aserká e nominadonan ku e petishon pa aseptá pa bira kondekorado. Kada un a aseptá. Despues tabatin un brindis.
Ku e aseptashon, formalmente tur kos ta kla pa e kondekorashon. Den e simannan binidero Sektor di Kultura i Deporte lo kompartí mas informashon di e trabounan meritorio di e nominadonan.
Direktor di Sektor di Kultura i Deporte sra. Lizette Sambo-Velder, sr. Pedro Herman Narvaez, sra. Haydee Remigia Clementina, sra. Joyce Ingrid Marguerite Adoptie-Treurniet, sra. Angelina de Ron-Tromp, Minister Sithree van Heydoorn, sra. Else Marie Eman-Bradshaw, sra. Irsaidy Recordino (representando sr. Rignald Sylvestre Recondino), sra. Judith Mauris, sr. Ryan Antony de Jongh, sra. Rose Mary Allen, sr. Curd Lawrence Evertz
