Publiká riba 30 Yüni 2020
WILLEMSTAD – Historiadónan di Radboud Universiteit na Nijmegen konhuntamente ku Archivo Nashonal Kòrsou i Universidat di Kòrsou Dr. Moises Da Costa Gomez, a start un proyekto pa investigá e impakto ku sklabitut tabatin riba bida di habitantenan di Kòrsou den e periodo di 1839 pa 1950. Komo promé resultado, dia 17 di ougùstùs benidero lo lansa e Registronan di Esklabo i e Registronan di Emansipashon riba wèpsait di Archivo Nashonal Kòrsou i tambe riba wèpsait di Archivo Nashonal Hulanda.
Pa por realisá e proyekto aki, mester traha un database ku ta kontené fuentenan di archivo ku ta kubri e poblashon di Kòrsou den e periodo entre 1839 pa 1950. Tantu e data di investigashon komo e fuentenan di archivo digitalisá lo bira disponibel pa investigadónan i tambe pa públiko en general.
Haña mas konosementu di e impakto di sklabitut
Lider di proyekto dr. Coen van Galen di universidat di Radboud, ku anteriormente a inisiá e proseso di digitalisashon di e Registronan di Esklabo di Sürnam, ta entusiasmá pa loke ta trata inisio di e investigashon basá riba fuentenan kurasoleño. “Kòrsou tin hopi archivo ku ta kontené informashon di personanan ku a biba den sklabitut i tambe nan desendientenan”. Sosiedat di e isla komersial Kòrsou tabata diferente for di esun di Sürnam, kaminda plantashon tabata sentral. Esaki ta enserá ku nos por formulá otro pregunta di investigashon, pero ku tambe nos por kompará ambos region.
E base pa e database di e poblashon kurasoleño ta e Registronan di Esklabo di Kòrsou, e Registro Sivil di Kòrsou, suplementá ku e Archivonan di Emansipashon (abolishon di sklabitut na 1863) i otro archivonan relatá. Huntu nan ta hasi posibel pa por sigui habitantenan di e isla pa generashonnan, di forma ku por midi e efekto di sklabitut riba e situashon sosial i ekonómiko di generashonnan mas despues.
Registronan di Esklabo i Registronan di Emansipashon
Start di e koperashon entre Universidat Radboud, Archivo Nashonal Kòrsou i Universidat di Kòrsou ta asina progresivo, ku ya kaba por publiká e promé resultadonan dia 17 di ougùstùs 2020. Riba e dia aki, ku sosten di Archivo Nashonal Hulanda lo lansa un database ku e Registro di Esklabo di Kòrsou. E database aki ta kontené data di e personanan ku entre 1839 i 1863 a biba esklabisá. Banda di esei e database ta kontené tambe e Registronan di Emansipashon. Esakinan ta listanan di hende ku a bira liber despues di abolishon di sklabitut na Kòrsou.
A base di tur dos fuente menshoná, ta habri e posibilidat for di e momentu ei pa hendenan hasi investigashon online ku ta konserní nan antepasadonan ku tabata biba esklabisá na Kòrsou. A skohé e fecha 17 di ougùstùs, debi ku ta Dia di Tula. Riba e dia aki Kòrsou ta konmemorá su pasado di sklabitut i alabes e rebelion kontra sklabitut na 1795 bou di guia di Tula. E aña aki ta eksaktamente 225 aña pasá ku e rebelion aki a tuma lugá. E database di e Registro di Esklabo – e Registro di Emansipashon di Kòrsou lo ta disponibel via e website di tantu Archivo Nashonal Kòrsou (www.nationaalarchief.cw) komo Archivo Nashonal Hulanda (www.nationaalarchief.nl).
Pa mas informashon por tuma kontakto ku:
