Publiká riba 29 Òktober 2020
WILLEMSTAD – Studiantenan di skol avansá ta keda kordialmente invitá pa partisipá den e promé kompetensia di essay aki na Kòrsou. E kompetensia aki ta keda organisá pa Ministerio di Desaroyo Ekonómiko (MEO) huntu ku Universidat di Kòrsou (UoC) i Sentro Internashonal di Komèrsio (International Trade Centre/ITC na Genéva, Suisa i e ta basá riba e Strategia Nashonal di Eksportashon pa Kòrsou.
Dia 22 di aprel di e aña aki, Konseho di Minister a aprobá e promé paso pa Kòrsou yega na nos propio Strategia Nashonal di Eksportashon (National Export Strategy). Nos vishon den e Strategia Nashonal pa Eksportashon di Kòrsou ta, pa nos tin un pais kaminda negoshi(nan) ta eksitoso. I a base di e vishon aki, nos a bin ta detayá entre otro e proseso, infrastruktura i reglanan di komèrsio.
Kontenido di e Strategia Nashonal pa Eksportashon ta basá primordialmente riba un Guia Stratégiko pa Desaroyo di Komèrsio (Strategic Trade Development Roadmap) ku a keda desaroyá huntu ku International Trade Centre (ITC), un agensia di Nashonnan Uní situá na Genéva, Suisa. Den e Guia Stratégiko aki, Kòrsou a definí kiko ta nos vishon pa desaroyo di eksportashon na Kòrsou, kua ta e sektornan di prioridat ku Kòrsou lo enfoká riba dje den e trayektoria aki i tambe kon e proseso di implementashon lo kana.
Konsiderando e importansia di e trayekto aki pa desaroyo di nos ekonomia, MEO, UoC i ITC a opta pa agregá un bista fresku i yòn den e proseso dor di involukrá hóbennan tambe. Dor di partisipá den e kompetensia di essay aki, e hóben ta haña e oportunidat pa forma su propio vishon tokante e Desaroyo Ekonómiko di Kòrsou, e ta hasi e hóben mas konsiente dikon komèrsio ta importante pa Kòrsou por yega na desaroyo ekonómiko duradero i alabes ta stimulá interes di e hóben den komèrsio internashonal.
Den e essay, e hóben lo mester elaborá, basá riba e vishon di e Strategia Nashonal di Eksportashon, kiko mester kambia pa nos por transformá Kòrsou den un destinashon kaminda berdaderamente negoshinan ta prosperá i kon nos por logra yega na e kambio aki.
Tur studiante ku ta inskribí na un skol di estudio avansá (Bachelor òf HBO) por partisipá na e kompetensia di essay aki. Edat máksimo pa e partisipante ta 28 aña. E essay mester ta skirbí na ingles i mester kontené entre 2.000 pa 3.000 palabra. Den e essay mester funda e kontenido ku tabèl, gráfika i imágen (esakinan lo no konta den e kantidat total di palabra).
Premio pa e ganadornan di e kompetensia aki ta konsistí di un promé premio di USD 2,500, di dos premio na balor di USD 1,500 i di tres premio lo ta USD 1,000. Aparte di e premionan aki lo tin 5 premio mas di USD 200 florin.
Pa haña un bista di tur regla i detaye di partisipashon na e kompetensia aki, bishitá www.whatscookingincuracao.com òf e wèpsait di Universidat di Kòrsou (www.uoc.cw)
Pa dowload e presentashon ku ta rekardá e tema, klek aki: https://bit.ly/3mznR8y
