Publiká riba 27 Mei 2023
Willemstad – Minister Charles Cooper huntu ku Dr. Albert Martis i un delegashon di Kòrsou a partisipá na e kongreso titulá “High-Level Dialogue on Early Warnings for All (EW4All)” di Organisashon Mundial di Meteorologia (WMO). Esaki a tuma lugá na Geneve, Swisa resientemente. Meta prinsipal di e kongreso aki tabata pa miembro di WMO diskuti tokante e tópiko. A hasi uso di e okashon aki pa papia di e kantidatura di Dr. Martis mirando ku pronto lo tin e elekshon pa e funshon di Sekretario General (SG) di WMO. Gobièrnu di Kòrsou ta apoyá Dr. Martis den esaki, i a pidi sosten di WMO p’é komo kantidato pa SG.
Minister Cooper a risibí e oportunidat pa a kompartí algun solushon kreativo desaroyá na Kòrsou, komo un miembro fundador di WMO. Minister Cooper ta un representante di un asina yamá ‘Small Island Development State’ (SIDS). Kòrsou ta un di e islanan den Karibe i ta forma parti di Reino Hulandes, i tin eksperensia ku desasternan natural inkluso orkannan violento.
Durante di su diskurso, Minister Charles Cooper a indiká ku Kòrsou ta un isla kaminda hopi diferente kultura for di islanan den Karibe, Amerika, Europa i Medio Oriente ta traha i biba huntu den harmonia. Resultado di esaki ta un pais multi-kultural kaminda nos ta boga pa tur hende, ku pashon i determinashon, sin laga niun hende patras! E último desaster natural mas grandi ku a tuma lugá na Kòrsou, a sosodé na 2010 ora Tormenta Tropikal Tomás a kousa inundashon fuerte (200-300 mm di awaseru den sinku ora) na diferente parti di Kòrsou.
Relashoná ku esaki, Servisio Meteorológiko Kòrsou ta traha solushonnan kreativo pa logra, entre otro:
• renobashon di e leinan meteorológiko;
• un sistema di alarma tempran di diferente tipo di peliger basá riba impakto;
• servisio adaptá pa media sosial i CAP;
• e èp pa telefon selular “Curacao Weather” ku a gana un premio spesial di WMO;
• un sistema di maneho di proseso;
• i mas
Tur esaki a logra ku rekursonan finansiero limitá, pero ku aliansanan fuerte ku varios miembronan di WMO manera Merka, Canada, Hulanda, Reino Uní, i Spaña, i aktornan nashonal i internashonal. Esaki tabata e yabi!
Na final di kuenta, esaki ta loke alarma tempran pa tur hende ta trata. Alarma tempran pa tur hende mester sigura ku TUR komunidat eksponé tin akseso inmediato na informashon aktual i eksakto pa salbá bida i propiedat.
Relashoná ku esaki, estadonan insular manera Kòrsou no ta víktima pasivo, sino buskadó di solushon aktivo manera e ehèmpel ku Kòrsou ta demonstrá. Islanan chikitu ta sufri profundamente for di desasternan natural, pero nan tambe ta guia pa un futuro sostenibel i regenerativo! E sekretariado di WMO por ta un medio pa duna poder i yudansa na miembronan di SIDS, i paisnan di menos desaroyo pa implementá e sistema di alarma tempran pa tur hende.
Minister Cooper a informá tambe ku Kòrsou ta hopi afortuná pa a kompletá e sistema di Alarma Tempran pa Tur Hende (EWS4All), huntu ku e grupo di maneho ekselente di Servisio Meteorológiko Kòrsou, ku Dr. Albert Martis komo nos direktor.
Tambe Kòrsou sa ku ainda tin miembronan for di SIDS, i paisnan di menos desaroyá ku ainda no a logra kompletá e proseso aki eksitosamente, i esaki ta importante pa Kòrsou, i Kòrsou ta prepará pa brinda nos sosten den e konteksto aki pa otro islanan i paisnan tambe yega na un sistema di alarma tempran pa tur hende huntu ku WMO.
Dor di traha huntu ku otro paisnan den desaroyo i paisnan desaroyá, Minister Cooper a indiká firmemente ku Kòrsou por fortifiká i rekuperá nos posishon na nivel nashonal, regional i global. Esaki ta e WMO ku Kòrsou ta mira den futuro. Komo un miembro fundador, Kòrsou ta komprometé pa kompartí nos eksperensia i traha riba solushonnan kreativo huntu ku demas miembronan di WMO, enkabesá pa e Sekretariado di WMO pa un futuro, kaminda miembronan spesialmente for di SIDS i paisnan di menos desaroyá ta benefisiá di koperashon internashonal komo parti di e konvenio di WMO.
Minister Cooper a pidi sosten di WMO, ku tin komo meta pa asistí SIDS i paisnan desaroyando ku inisiativanan manera Alarma Tempran pa Tur Hende, pa loke ta desaroyo di kapasidat i entrenamentu. Pasobra Kòrsou ta komprondé manera ningun otro e difikultatnan ku SIDS i paisnan desaroyando ta enfrentá.
Un WMO berdaderamente presente na nivel nashonal, regional i global kaminda e interesnan di SIDS i paisnan desaroyando ta na tòp di agènda ehekutivo di WMO, esaki ta nos meta.
