Publiká riba 30 Mei 2022
Willemstad – Servisio di Atmishon ta sigui duna su máksimo pa keda brinda mihó servisio na su klientenan. No opstante di esei Servisio di Atmishon ta keda enkontrá retonan ku por trese malkontentu serka klientenan. Pa e motibu akí ta pidi indulgensia na e klientenan ku a apliká.
Mirando e kantidat di aplikashonnan ku a drenta pa e proyekto di Integrashon Responsabel, i tambe e kantidat di aplikashonnan ku a i ta drenta pa e trayekto regular, Servisio di Atmishon ta enkontrá su mes ku diferente reto pa por kaba di atendé e aplikashonnan dentro di e periodo stipulá di kuater (4) luna pa e trayektonan regular i diesdos (12) luna pa e trayekto di Integrashon Responsabel. Banda di esaki e falta di personal di forma króniko tambe ta hunga un ròl ku no por kaba di atendé tur aplikashon na tempu.
Servisio di Atmishon ta pidi indulgensia na tur persona ku a apliká pa e trayektonan ya menshoná, tanten ta sigui hasi máksimo esfuerso pa por atendé kada un aplikashon ku e profeshonalismo i dedikashon kustumbá.
Tambe kier a rekordá tur persona ku a apliká i no a risibí nan komprobante ainda, ku e kontesta outomátiko ku a risibí na momentu ku a hasi e aplikashon, ta sirbi komo komprobante te na momentu ku risibí esun ofisial.
Pa finalisá, un rekordatorio ta bai na tur persona ku a apliká, ku por subi riba nos wèpsait https://immigrationcur.org/dep/status pa kontrolá e estado di e aplikashon dor di yena e number di registrashon. Na momento ku a kaba di atendé e aplikashon kompletu e kliente por mira esaki riba e wèpsait i aki mes por traha un sita pa pasa na ofisina di Servisio di Atmishon.
