Publiká riba 25 Ougùstùs 2020
Willemstad – Relashoná ku e medidanan tumá pa gobièrnu, Sektor di Labor di Ministerio di Desaroyo Sosial, Labor & Bienestar (SOAW) ta informá ku entrante dia 26 di ougùstùs 2020, tur bishitante mester atené su mes na reglanan di seguridat, di distansia sosial i di higiena.
Reglanan vigente pa limitá transmishon di COVID-19 ta pone ku Sektor di Labor lo atendé kliente solamente ku sita. Esaki pa evitá aglomerashon grandi di hende den nos edifisio.
Medidanan di gobièrnu i di seguridat ta enserá ku mester kumpli ku aspektonan di higiena i mantené distansia sosial.
Tur persona òf kliente ku mester hasi entrega pa pèrmit di trabou, hasi registrashon di kompania i tambe registrashon di buskadó di trabou, mester yama 724 5300 i traha un sita. Sektor di Labor lo no atendé personanan ku no tin un sita. Si pa un motibu e persona no por kumpli ku su sita, sea asina bon di informá/kanselá bo sita pa asina nos por yuda un otro persona.
Sektor di Labor tambe ta informá ku ta rekomendabel pa, ora di bishitá nos ofisina, tur persona sigui instrukshon duná dor di personal di seguridat i hasi uso di protekshon di boka (mondkapje) of un faceshield pa bo mes protekshon i protekshon di nos personal.
Sektor di Labor ta spera ku tur nos bishitantenan lo tin komprenshon pa e situashon ku nos ta aden i ta spera kooperashon di tur hende ku ke hasi uso di nos produkto i servisionan. Un danki na tur pa nan kooperashon.
