Publiká riba 24 Febrüari 2021
WILLEMSTAD – Servisio pa Planifikashon Urbano (ROP) ta anunsiá ku konforme e lei di Òrdu Públiko (Landsverordening Openbare Orde (LOO)), ku a drenta na vigor dia 1 di ougùstùs 2015, a kuminsá kita ophetonan di propaganda polítiko den área públiko.
VVRP a kuminsá kita tur bòrchi òf otro opheto di propaganda polítiko ku doñonan no a kitá den e tempu stipulá. Lo kita e ophetonan di propaganda riba kosto di e persona/partido ku a violá e lei di Òrdu Públiko. Gobièrnu no ta para responsabel pa dañonan na e bòrchi òf otro ophetonan di propaganda polítiko ku ser kitá.
Den e término stipulá di dos siman, desde e fecha ku a pega e steker riba e bòrchinan, algun partido polítiko a kita nan ophetonan di propaganda polítiko. Mester informá tambe ku ya kaba VVRP a hasi inspekshon na diferente áreanan ku no ta pèrmití, manera na bòrchi di tráfiko, lusnan di tráfiko, mobilario di kaya, krusadanan, plenchinan, riba ‘middenberm’ i rotònde.
Pa mas informashon tokante esaki por tuma kontakto ku Servisio pa Planifikashon Urbano (ROP) via di number di telefòn 433-3200, 511-3874 òf na e-mail info.rop@gobiernu.cw. Pa mas informashon tokante e eksigensianan pa bòrchi òf otro ophetonan di propaganda, por tuma nota di e Maneho pa Ophetonan di Propaganda (Beleid voor Reclame-uitingen) riba e wèpsait di VVRP (www.vvrp.cw).
