Notisia

WILLEMSTAD- Ya pa dos aña kaba nos pueblo no por a selebrá dia di Rei manera nos a kustumbrá di hasi esaki den pasado pa motibu di e limitashon i prekoushonnan ku COVID-19 a trese kuné. Konsiderando ku mayoria medidanan di COVID a keda suavisá òf kompletamente anulá durante e simannan tras di lomba, Konseho di Minister a bai di akuerdo pa organisá selebrashon di Dia di Rei e aña akí atrobe. Na nòmber di Gobièrnu di Kòrsou, Ministerio di Desaroyo Ekonómiko ta hasi un yamada na tur persona interesá pa bende kos den sentro di siudat riba Dia di Rei, esta 27 di aprel 2022, di manera ku nos ta trese bida den nos sentro di siudat i duna un impulso na nos ekonomia. Personanan interesá den un pèrmit temporal di ‘standplaats’ òf ‘vènt’ pa e dia akí, mester aserká organisadó di e evento, kende na su turno lo entregá petishon pa pèrmit pa tur persona ku lo bende kos den e zona ku e ta manehá.

Un pèrmit di ‘standplaats’ ta nifiká ku e persona ta risibí outorisashon pa para na un sitio spesífiko i bende su produkto, miéntras ku un pèrmit di ‘vènt’ ta destiná pa e persona ku kier bende kos di forma ambulante, esta moviendo di un lugá pa otro den e zona spesífiko.

For di aña 2020 Konseho di Minister a bai di akuerdo pa en konekshon ku e selebrashon di Dia di Rei repartí sentro di siudat den 6 zona:

• Zona 1: E área rondó di Marshe Rondó, inkluyendo Plasa Wilson ‘Papa’ Godett (plenchi dilanti di Pòstkantor) i de Ruyterkade kompleto (for di Sha Caprileskade te na e skina di Handelskade)
• Zona 2: Tur e hanchinan di Punda kaminda normalmente sa tin marshe/aktividat durante Dia di Rei, inkluyendo Plasa Jojo Correa, Gouvernementsplein, Wilhelminaplein, Hendrikplein i Waterfortplein.
• Zona 3: Nieuwestraat i Kaya Wilson ‘Papa’Godett (Pietermaai).
• Zona 4: Breedestraat Otrobanda te na Frederikstraat (e kaya enfrente di Netto Bar).
• Zona 5: Molenplein te na Sebastopolstraat (stashon di bùs) i Awasá (Fuik).
• Zona 6: Brionplein.

Pa un pèrmit di ‘standplaats’ òf ‘vènt’ pa bende kos den kualke un di e zonanan ariba menshoná riba dia di Rei 2022, mester aserká direktamente e organisadó ku tin maneho di e zona, esta:

Zona 1: Fundashon Marshe (+5999 511-1176)
Zona 2:  Dutch Dream Special Events ( +5999 461-9393)
Zona 3: Leila Oosterling (+5999 693-1848)
Zonanan 4 i 6:  Sosiedat di Komersiantenan di Otrobanda (SKO) (+5999 462-3591)
Zona 5: Enrich (+5999 682-8053)

Nos ta urgi tur persona ku ta deseá di bende kos riba Dia di Rei 2022, pa tuma kontakto ku e organisadó konserní mas pronto posibel pa mas informashon, komo ku e organisadó tin te ku 1 di aprel 2022 pa entregá e petishon pa e pèrmitnan di tantu ‘standplaats’ komo ‘vènt’.

Pa mas informashon tokante dokumentonan nesesario, tarifanan i informashon general tokante e pèrmitnan temporal di ‘standplaats’ i ‘vènt’, por tuma kontakto libremente ku e organisadó konserní òf ku Lokèt di Pèrmit na numbernan di telefòn 434-1691.

______________

Pa dowload e ‘checklist’ di rekisitonan ku mester pa e pèrmitnan temporal, klek aki: https://bit.ly/ChecklistStandEnVent
Pa e lista di tarifanan pa mará na kada tipo di pèrmit, klek aki: https://bit.ly/ListaDiTarifa
Pa e formulario di ‘standplaats’ temporal, klek aki: https://bit.ly/FormularioStandplaats
Pa e formulario di ‘vent’ temporal, klek aki: https://bit.ly/FormularioVent

MAS NOTISIA

Ministerio konserní: Desaroyo Ekonómiko