Publiká riba 17 Òktober 2022
WILLEMSTAD – Gobièrnu ta aserká ‘Stichting Overheidsaccountantsbureau’ (SOAB) pa hasi un evaluashon di e trayekto ku a kana pa yega na e Emblema – konsepto ku públiko a skohé. Pa lokual ta trata e parti legal di derechonan di outor ta aserká un eksperto pa duna konseho.
Minister Sithree van Heydoorn i Komishon Emblema Nashonal Kòrsou (17 òktober 2022)
Esaki ta un palabrashon konkreto ku Minister Sithree van Heydoorn i Komishon Emblema Nashonal Kòrsou a hasi pa trese klaridat. E palabrashon aki a tuma lugá durante un reunion ku a tuma lugá djaluna, 17 di òktober 2022.
E minister a evaluá i dialogá ku e miembronan di e komishon riba diferente temanan relevante ku ta di importansia pa ku e konsepto ku a keda skohé komo esun ganadó. Tambe a pone énfasis riba e echo ku e trayekto aki tabata unu kaminda pueblo den e fase aki por a partisipá i a skohe esun ganadó.
E tarea di e komishon tabata pa krea regla i kriteria pa tur persona por partisipá. Tambe e komishon tabatin komo tarea pa selektá un máksimo di 10 finalista for di e 205 diseñonan ku e partisipantenan a entregá. Despues komunidat a haña oportunidat pa vota pa nan emblema faborito. Na final e komishon a konsehá Konseho di Minister pa skohé esun ku a haña mas voto di públiko. E eskoho aki kual a keda presentá na públiko 10-10-22 lo tin ku bai siguí e trayekto tradishonal pa wòrdu formalisá.
Pa klaridat ta bon pa bisa ku e desishon pa inisiá e trayekto aki a tuma lugá na desèmber 2020. Den un trayekto di solisitut públiko ku a tuma lugá na febrüari 2021 a skohe 5 siudadano (tuma nota di e LB i MB athunto), pa forma parti di e komishon ku mester a kanalisá e trayekto pa yega na un emblema. E mesun 5 siudadanonan aki a keda forma parti di e komishon te ku dia ku e konsepto a keda presentá na públiko
Despues di a reuní ku miembronan di e komishon e minister a informá e señora ku a gana e premio. Asina e señora a keda informá ku huntu ta bai hasi un evaluashon den kuadro di e proseso ku e komishon a kana durante di e trayekto. E tarea prinsipal pa un evaluashon, pa trese klaridat i transparensia. Den esaki ta bai wak si tin violashon di kualkier kriterio ku partisipantenan mester a tene nan mes na dje, si tabatin violashon di derechi di outor i si a privilegiá un òf mas partisipante den e trayekto aki.
Gobièrnu ta informá ku riba un término korto por dispone di resultado di e evaluashon SOAB i lo publiká esaki. Gobièrnu lo no ta duna mas deklarashon tokante e trayekto di Emblema te na momentu ku publiká resultado di e evaluashon.
