Publiká riba 27 Mei 2020
Willemstad – Dia 1 di yüni 2020 e departamentu di kùrmentu di personanan ku ta prepará kuminda, e asina yamá ‘foodhandler’, ta reanudá su servisionan. Lo atendé kùrmentu den 2 fase. E promé fase ta for di dia 1 di yüni. E ta pa personanan ku nan karchi di kùr a kaduká durante e lunanan di mart, aprel i mei 2020.
E di dos fase, kual ta for di dia 15 di yüni, ta kùrmentu regular pa personanan ku nan karchi a kaduká promé ku mart 2020, pa esnan ku nan karchi ta kaduká despues di 30 di mei 2020 i pa esnan ku ta kùr pa promé biaha.
Durante henter e proseso ta tene kuenta ku e normal nobo. E kliente por pasa na G&Gz (ántes GGD) durante orario di trabou pa paga Fl 50. Por haña e informashon nesesario na diferente idioma riba wèpsait di www.gobiernu.cw òf Facebook di “Ministry of Health”. Durante èksamen lo tene kuenta ku e 2 meter di distansha entre kada kliente. Pa tur informashon adishonal tokante karchi di kùr por bishitá Facebook di “Ministry of Health”.