Publiká riba 19 Novèmber 2019
WILLEMSTAD – Durante di rueda di prensa ‘Konsulta ku Promé Minister’, Minister Presidènt Sr. Eugene Ruggenaath i Minister enkargá ku Ministerio di Desaroyo Sosial, Labor i Bienestar, sr. Hensley Koeiman, a introdusí i presentá Agènda pa Desaroyo Sosial pa Kòrsou 2019-2021: “Kai, Lanta i Sigui”. E Agènda pa Desaroyo Sosial ta un esfuerso mayó i integrá di gobièrnu pa na un forma dirigí, basá riba un vishon, pone un fundeshi fuerte pa E hende ta mas prepará di moda ku e por konfrontá retonan i ta kapas pa desaroyá su potensial. E Agènda pa Desaroyo Sosial ta forma parti di Strategia di Kresementu pa Kòrsou i ta trahá pa Ministerio di Desaroyo Sosial, Labor i Bienestar, Fundashon Reda Sosial, ku ta kai bou di Ministerio di Asuntunan General i den estrecho kolaborashon ku otro ministerionan. E agènda ta konta ku sosten di Konseho di Minister i su finansiamentu ta sigurá.
Nesesidat i enfoke di e Agènda pa Desaroyo Sosial
Gobièrnu ta bon konsiente ku no ta sufisiente pa traha solamente riba maneho finansiero di pais, desaroyá ekonomia i fortifiká e aparato públiko. Sifranan ta mustra ku e kalidat di bida di hopi hende den nos komunidat ta bayendo atras. Esaki ta hasi un aserkamentu integral, basá riba un vishon kla, sumamente nesesario. Mester krea oportunidat pa desaroyo di hende, mehorá kalidat di bida di nos pueblo i traha tambe riba forsa di nos pueblo pa rekuperá despues di enkontrá desafionan. Ku e Agènda pa Desaroyo Sosial gobièrnu ta pone mas énfasis riba sosten na famia, mas hende na trabou, stimulá forsa i ánimo pa sigui dilanti apesar di retonan difísil i mihó kalidat di bida. Pa medio di diferente proyekto, kual ta agrupá den e tres áreanan di enfoke esta hende, trabou i bario, aktivamente ta influensiá e faktornan ku tin influensia riba desaroyo di e suidadano ku ta entre otro su famia i konosínan, su komunidat, institutonan rondó di dje, skol, trabou i kas.
Kla pa ranka sali ku fondonan reservá
Durante di e último lunanan Ministerio di Desaroyo Sosial, Labor i Bienestar i Reda Sosial, den estrecho kolaborashon ku otro Ministerionan, a traha riba e agènda pa desaroyo sosial. Un faktor hopi importante pa por garantisá realisashon di e agènda ta disponibilidat di fondonan. Gobièrnu di Kòrsou a reservá i lo invertí, for di fondonan ku a bin liber for di benta di akshonnan di UTS, den ehekushon di e Agènda pa Desaroyo Sosial. E agènda ta kai bou di e responsabilidat di Minister pa Desaroyo Sosial, Labor i Bienestar i Minister pa Asuntunan General i ta keda kordiná pa Programma Management Organisatie (PMO) di Strategia di Kresementu pa Kòrsou. Timnan di kambio (Veranderteams) konsistiendo di tantu e Ministerio di Desaroyo Sosial, Labor i Bienestar i Reda Sosial lo guia e diferente proyektonan. Pronto lo start ku e promé proyektonan di prioridat.
Den palabranan di Promé Minister Sr. Rhuggenaath: “Pa medio di nos Agènda pa Desaroyo Sosial nos tei duna e mesun prioridat i dedikashon na desaroyo sosial di nos suidadanonan i nos komunidat ku nos ta duna na e otro pilánan di nos Strategia di Kresementu. Gobièrnu tin ku tuma su responsabilidat pa atendé ku nos situashon finansiero-ekonómiko, pero esaki mester kana man den man ku invershonnan nesesario den desaroyo sosial di nos komunidat. Gabinete Rhuggenaath ta bai kumpli ku e enkargo ei. Ta bai invertí den e agènda sosial basá riba un aserkamentu integral di hende, trabou i bario. Pa duna sosten asina personanan por konfrontá reto i sigui prosperá, i sigui fortifiká nos barionan manera ya a inisiá den e programa piloto di urgensia. Esaki ta algu ku nos komo gobièrnu lo hasi huntu ku tur entidat i personanan ku ta i lo kontribuí na e diferente proyektonan, pasobra ta huntu nos ta stimulá e adelanto di nos mes hendenan.”
Segun Minister pa Desaroyo Sosial, Labor i Bienestar Sr. Hensley Koeiman: “Tur hende por hañ’é den un situashon difísil, pero importante ta ku ora nos kai, nos sa di lanta i sigui pa dilanti. Alabes nos tur ta responsabel pa trese un situashon sosial muchu mas humano. Nos vishon ta pa krea un komunidat ku ta desaroyá sosial optimal i ta formá di tal manera ku konhuntamente ta sòru p’e otro. Gobièrnu no por hasi tur kos. Pero gobièrnu si por krea e infrastruktura pa kada suidadano tin oportunidat pa partisipá den bida sosial i laboral, asina e ta sintié responsabel pa bienestar di nos komunidat. Nos a desaroyá e Agènda pa Desaroyo Sosial netamente ku esaki den mente. E nesesidat den nos komunidat ta grandi i nos ta determiná pa realisá e agènda pa desaroyo sosial.”
