Notisia

Willemstad – Sektor di Kultura i Deporte di Gobièrnu di Kòrsou i Fundashon pa Desaroyo Integral di Mucha (SIFMA/ODIM) ta risibiendo bastante pregunta pa ku kontinuashon i pagonan sentronan pre-eskolar. Athuntu mas informashon pa mayornan.

Areglo ku sento pre-eskolar
Ta importante pa informá ku sentronan ta personanan legal riba nan mes ku por drenta un areglo ku mayornan den e situashon aktual. Apesar di esaki Ministerio di Enseñansa ta hasi un apelashon na tantu sentronan pre-eskolar komo na mayornan pa nos ban koperá ku otro pa por pasa e temporada difísil akí.

E petishon ta bai pa kada mayor tuma kontakto ku e sentro konserní via telefòn pa asina por deliberá riba nan kaso spesífiko i yega na un situashon kumbiniente pa ambos partido. Ta importante pa kòrda ku e yu mester sigui bai e sentro ora e situashon normalisá i ku e sentro-pre-eskolar tambe tin su debernan pa kumpli kuné tur fin di luna, primordialmente e pago na e lidernan pre-eskolar. Ta hasi un apelashon na mayornan ku tin nan trabou ahinda i ku por paga e sentro-pre-eskolar pa kumpli ku esaki mas tantu posibel pa medio di yega na un akuerdo ku e doño di e sentronan pre-eskolar.

Registrashon di mayornan ku a pèrdè trabou
Pa mayornan ku a pèrdè trabou e petishon ta pa nan registrá nan mes na Fundashon pa Desaroyo Integral di Mucha (SIFMA/ODIM). Intenshon di e registrashon di mayornan ku a pèrdè trabou ta pa asina Gobièrnu por haña un bista kla di e situashon i por tin datos aktual.

Por registrá serka ODIM pa medio di yama/whatsapp durante oranan di ofisina 8:00-12:00 i 14:00-17:00. Telefon: 670-2930, 670-2931 i 670-2932.  Email: registrashonodim@gmail.com

Pa registra mester tin e siguiente dokumentonan:
1. Sedulá bálido
2. Prueba di e trabou ku tabata ehersé (kontrato)
3. Karta di retiro
4. Kontrato di e sentro-pre-eskolar ku e yu ta bishitá
5. Komprobante di 3 último luna nan di pago na e sentro-pre-eskolar.

Trahadornan den sektor vital ku mester di kuido pa yunan
Mayornan ku ta laborá den un profeshon vital ku ta eksihí di nan ku nan mester ta na trabou segun e listaofisial, por ehèmpel den área di enfermeria, enseñansa, supermerkado, hustisia, media, transporte públiko, Selikòr, por komuniká ku e sentro ku nan yu ta bishitá i e sentro ta duna informashon di e sentro e sentro pre-eskolar pa krisis. Na momentu ku hasi petishon pa e yu bishitá e sentro pre-eskolar pa krisis, e sentro lo hasi algun pregunta kòrtiku pa evaluá e petishon.

Pa mas informashon òf pregunta, por tuma kontakto ku fundashon SIFMA/ODIM: Whatsapp: +599 9 6702930, +599 9 670 2931, +599 9 670 2932 òf yama/whatsapp: +599 9 5297369,+599 9 562 7369

MAS NOTISIA

Ministerio konserní: Enseñansa, Siensia, Kultura & Deporte