Publiká riba 02 Yüni 2020
WILLEMSTAD – Relashoná ku reapertura di skolnan entrante 1 di yüni 2020, Ministerio di Enseñansa, Siensia, Kultura i Deporte a sinta huntu ku Komishon di roster di fakansi i a yega na e siguiente desishonnan pa ku periodo di fakansi, klousura di aña eskolar aktual i apertura di aña eskolar 2020-2021:
Último dia di aña eskolar 2019/2020 ta djabièrnè 10 di yüli 2020
Tur skol tin e outorisashon i posibilidat pa por hasi uso kompleto di e último siman di skol, kaminda si ta nesesario hasi uso di e èkstra dia (esta 10 di yüli) pa kaba nan programa, hasi entregá di diploma i otro trámitenan nesesario. Kada skol ta finalisá su propio roster i komuniká esaki ku alumno i mayor.
Promé dia di aña eskolar 2020/2021 ta djaweps 20 di ougùstùs 2020
Komishon di roster di fakansi ku ta konsistí di representashon di direktivanan di skol, representashon di sindikato di enseñansa, representashon di departamentu di maneho i sektor di enseñansa i siensia, i tambe sentro di ekspertisio i èksamen unánimamente a disidí ku ta mantené e periodo di fakansi igual. Konforme práktika regular, skolnan lo hasi apelashon na maestronan pa sostené ku preparashonnan nesesario durante e periodo di fakansi.
Pa informashon di e kalendario eskolar pa añanan 2019/2020/2021 klik riba e link aki: kalendario eskolar 2019/2020/2021.
Gobièrnu di Kòrsou ta deseá tur skol un bon reapertura i éksito ku e último simannan di skol.
