Publiká riba 16 Mart 2020
WILLEMSTAD- A konsekuensia di e situashon ku nos pais ta konfrontá aktualmente pa loke ta trata e vírùs di COVID-19, Gobièrnu di Kòrsou a hasi un apelashon na Aqualectra pa temporalmente rekonektá awa pa klientenan di kual esaki a keda kòrtá previamente. Minister di Desaroyo Ekonomiko, sra Giselle Mc William ta konsiderá esaki sumamente importante mirando ku di e forma aki ta hasi posibel pa e klientenan aki tambe por sigui proseduranannan indiká di higiena i asina yuda minimalisá ekspanshon di e vírùs di Corona.
Segun indikashon di Aqualectra tin na e momentunan aki tin un kantidat di alrededor di 2,116 siudadano ku no ta dispone di un konekshon di awa.
Bou di e kantidat di kliente aki tin algun ku ya ta konosí na Ministerio di Desaroyo Sosial, Labor i Bienestar (SOAW). Komo tal e grupo di kliente aki, pa sirkunstansianan sosial, no ta logra kubri nan kuenta di awa mensualmente. Pues ku intervenshon di SOAW, Aqualectra lo aserka e grupo di kliente aki pa asina hasi palabrashonnan konkreto pa loke ta trata e pasonan ku lo mester tuma despues di e rekonekshon. Segun promé kalkulashonnan di Aqualectra, ta trata aki di masoménos 150 pa 200 kliente. Den palabrashon, e klientenan aki lo risibí rekonekshon di awa pa mas tardá djamars 17 di mart.
Pa loke ta trata tur e demas klientenan ku no ta kliente di SOAW, Aqualectra a kumbiní di suavisá e kondishonnan pa por drenta un areglo di pago. Aqualectra a primintí di kontinuamente informá su klientela debidamente tokante esaki via medionan di komunikashon lokal pero tambe via di nan página di Facebook. Si akaso tin di e klientenan aki ku pa motibunan sosial no por kumpli ku e pago atrasá, mester tuma kontakto ku e Kas di Bario mas serka di bo pa asina nan por atendé esaki i pone Aqualectra na altura si esaki ta nesesario.
Un di e pasonan esensial den prevenshon di Coronavirus ta pa mantené un nivel di higiena optimal. Pa ku esaki Minister Mc William ta enfatisá ku ta importante den e situashonnan manera esun ku nos ta konfrontá, pa nos mustra solidaridat pa ku esnan mas frágil den nos komunidat. World Health Organization(WHO) ta keda suprayá ku pa kombatí e vírùs aki, ta esensial pa hende tin akseso liber na awa limpi pa asina por mantené un nivel di higiena optimal. Den esaki Gobièrnu di Kòrsou a hasi su parti pa ku palabrashonnan konkreto ku Aqualectra komo nos kompania di awa i utilidat. Di e forma aki Gobièrnu ke yuda frena posibel oumento di kasonan di Coronavirus a konsekuensia di falta di higiena.
Klientenan ku mester drenta den kontakto ku Aqualectra pa informashon tokante esaki òf pa un areglo, por hasi esaki via di su página di Facebook òf yama via 0800-0135.
