Publiká riba 23 Febrüari 2023
Willemstad – Minister Charles Cooper, ku orguyo profundo, ta partisipá ku Gobièrnu di Kòrsou a postulá Dr. Albert Martis, Direktor di Servisio Meteorológiko Kòrsou, komo kantidato pa e siguiente Sekretario General di e Organisashon Mundial di Meteorologia, esta World Meteorological Organization(WMO). Durante di e kongreso di WMO na mei próksimo e elekshon lo tuma lugá.
E postulashon ofisial a tuma lugá dia 24 di februari 2023 na e ofisina prinsipal di WMO na Geneve, Swisa dor di Minister Charles Cooper, den kompania Sekretario General di Ministerio di Tráfiko, Transporte i Planifikashon Urbano (VVRP), Sr. Puriel, Minister Plenipoteniaro di Korsou sr C. Manuel, i Hefe di Kabinèt di Minister Cooper, Sra. Pikerie. Esaki ta un primisia i un echo históriko, komo ku ta promé biaha den historia ku un isla di Karibe, ku ta wòrdú konsiderá tambe di ta un ‘small island development state’, ta postulá un kandidato pa un funshon haltu asina na WMO.
Anteriormente na 2019 Dr. Albert Martis a keda elehí komo Segundo Visé Presidente di WMO durante di e di 18 kongreso di Meteorologia Mundial. Esaki ta su promé termino den e puesto di Vise Presidente di WMO.
Dr. Albert Martis ta alabes representante permanente di Kòrsou i Sint Maarten pa WMO for di 2010. Di 2008 pa 2010, el a funshoná komo Direktor di Servisio Meteorológiko di Antias i Aruba, i tabata representante permanente di Antias i Aruba pa WMO.
Promé ku esaki, di 2000 pa 2007, Dr. Martis tabata hefe di e divishon di investigashon di Servisio Meteorológiko di Antias i Aruba. For di e tempu ei (2000), te ku awor el a sirbi WMO komo eksperto i miembro di diferente grupo di trabou, komishon, i komite.
Despues di a optené su Masteria den Siensia di Físika na Universidat di Nijmegen na Hulanda na 1994, Dr. Martis a kompletá su doktorado den Físika Atmosfériko na Universiat di Bonn na Alemania na 1998. E ta outor i ko-outor di diferente publikashon.
Minister Cooper ta sumamente orguyoso di nos yu di Kòrsou Dr. Martis i ta dese’é éksito ku e postulashon aki.
