Publiká riba 02 Desèmber 2019
Willemstad – Personanan ku ta biba den kuido residensial òf den un instituto di detenshon, hopi biaha tin komo karakterístika, un komportashon antisosial òf delinkuente. Pa e personanan aki por bai funshoná bon òf mas mihó, den nos komunidat òf unda ku ta na mundu, nan mester di ayudo i nan mester wòrdu siñá, kon pa pone un base nobo, kon nan por desviá nan komportashon antisosial pa unu positivo.
Den e kuadro aki SDKK, den su esfuersonan di resosialisashon, ta implementá programanan di metódikonan integral pa entre otro den grupo hasi e personanan ku ta detené, spesialmente e hóbennan, konsiente di nan mes manera di pensa i aktua i ta siña nan pa tuma responsabilidat pa esaki dor di siña traha huntu na un manera positivo. SDKK ta haña ku esaki ta importante, paso dor di siña e persona ku ta detené i sigur e hóbennan detené, ku den tur situashon nan por skohe pa un solushon positivo. Asina aki SDKK ta traha pa pone un fundamentu sólido pa un futuro ku un komportashon positivo i pro sosial. Esaki tin ku konta pa e temporada ku e persona ta detené den SDKK i tambe pafó di SDKK, es desir den nan bida den su totalidat.
Usando metódikonan sientífiko ku a demostrá nan mes kaba rònt mundu, SDKK ta trata na hasi intervenshonnan riba e komportashon di entre e persona adulto i espesialmente e hóbennan ku ta den e instituto.
Pa por logra mustra i siña e persona detené e nesesidat di un komportashon positivo i sosial ta importante pa den e mesun rosea, siña esnan ku ta traha diariamente ku nan, tambe esaki den kuadro di kapasitashon profeshonal. Ta importante pa e persona detené i sigur e hóbennan mira práktikamente ki pensamentu i aktitut ta wòrdu sperá i deseá di nan. Importante ta pa focus riba un aktitut metódiko ku un adulto mester tin pa por ta un role model pa su yu(nan) i hóbennan. Tambe kon komo adulto bo por hiba kòmbersashonnan motivante ku un otro adulto òf ku un hóben, pa asina saka lo mihó for di otro adulto i e hóben. Anto esaki ta konta pa den tur tipo di situashon di bida, na kas, na skol, na trabou, ora bo ta hasi deporte, ora bo ta hasi arte, ora bo ta na fiesta, den tráfiko, ets.
Ora ta trata di enseñansa den un instituto di detenshon, abilidatnan sosial, argumentashon moral i dil ku rabia òf frustrashon ta puntonan ku diariamente ta eksigí nan atenshon. Ta p’esei ora ta ofresé edukashon i formashon na personanan den detenshon, mester pone eksigensia i énfasis na programanan ku ta yuda e persona detené pa siña na un manera positivo pa tuma nan responsabilidat pa nan mes manera di pensa i nan manera di aktua. Es desir tin ku pone hopi atenshon na kon siña e persona kon pa usa pensamentunan salú ku ta yuda nan pa traha huntu i na un manera positivo den grupo. Sentral akiden ta pará: krea un ambiente positivo den SDKK, pa asina e persona detené i sigur e hóbennan ta wòrdu motivá, ta wòrdu siñá pa yuda otro, papia ku otro ora ku algu fèrfelu pasa i siña di otro.
