Publiká riba 11 Òktober 2021
Kòrsou ta un stap mas serka di bira Miembro Independiente den World Trade Organization.
WILLEMSTAD – Djabièrne 8 di òktober 2021, Minister di Desaroyo Ekonómiko sr. Ruisandro Cijntje a risibí e asina yamá Memorandum of Foreign Trade Regime (MFTR). Presidente di Komishon Permanente pa Komèrsio Internashonal i Relashonnan Ekonómiko Internashonal, sr. Caryl Monte, a entregá esaki durante di un momentu seremonial. E dokumentu akí a bai pa World Trade Organization (WTO) na ougùstùs último, den kuadro di akseso di Kòrsou komo miembro independiente den e organisashon mas importante, ku ta atendé ku reglanan di Komèrsio Internashonal na Mundu.
Aktualmente WTO ta konsistí di 164 pais miembro. Segun e prosedura di WTO e miembronan akí ta bai repasá e MFTR di Kòrsou ku ta deskribí tur loke ta maneho-, lei- i regulashonan ku ta aplikabel na Kòrsou riba tereno di komèrsio, esta importashon i eksportashon. E MFTR ta e dokumentu di mas kompletu aktualmente di tur loke ta aplikando i lo bai apliká riba tereno di importashon i eksportashon aki na Kòrsou. E paisnan miembro – a base di nan komentarionan – lo indiká kiko mester tene kuenta kuné i unda mester adaptá, ta mas skèrpi of tin ku renobá maneho i/òf lei pa asina garantisá ku komèrsio ta transparente, hustu, étiko i balansá (e asina yamá ‘level playing field’).
E Memorandum of Foreign Trade Regime ta un esfuerso konhunto di un tim di profeshonalnan lokal ku pa mas ku un aña a traha huntu pa kompilá tur informashon, di forma ku WTO por sigui fasilitá e proseso pa Kòrsou su miembresia independiente. Profeshonalnan di MEO, Douane i tambe ekspertonan riba e tereno di Komèrsio Internashonal i Ekonomia, tantu paden komo pafó di gobièrnu, a kontribuí na e kontenido.
Durante di e último aña i mei, i tambe mei mei di e pandemia di COVID-19, mas di 75 ámtenar di diferente ministerio i organisashonnan ku ta forma parti di e kadena di komèrsio internashonal na Kòrsou, a risibí kapasitashon (di forma virtual) serka ekspertonan di WTO riba áreanan manera negosiashon, reglanan di origen, eksportashon i importashon di produktonan, servisio i propiedat intelektual. Minister Cijntje di Desaroyo Ekonómiko a gradisí tur esnan ku a traha riba e dokumento i ku tin hopi tempu ta trahando pa logra e meta akí. Segun minister Cijntje ta esensial pa nos sigui hasi tur loke ta nesesario pa Kòrsou su ekonomia logra bai dilanti. Kòrsou tin hopi reto i hopi barera. Mester sigui traha huntu pa kibra i pasa riba tur barera.
E trayekto pa miembresia independiente den WTO ta keda ehekutá pa e Komishon Permanente di Komèrsio Internashonal i Relashonnan Ekonómiko Internashonal instituí na Sèptèmber 2017. E ta un komishon multidisiplinario i tin un presidente ku ta independiente i eksperto riba e tereno. Banda di esei, diferente organisashon i ministerio ta enbolbí den e komishon permanente manera Ministerio di Desaroyo Ekonómiko (MEO), Ministerio di Finansa representá pa Douane, Directie Buitenlandse Betrekkingen di Ministerio di Asuntunan General (AZ), Ministerio di Desaroyo Sosial, Labor i Bienestar (SOAW), Ministerio di Salubridat, Medio Ambiente i Naturalesa (GMN), FTAC i Bureau Telecommunicatie & Post (BTP). Presidente di e Komishon Permanente ta e negoshadó prinsipal pa Kòrsou den WTO i tambe pa e Akuerdonan Komersial Bilateral ku paisnan den nos region.
Klek aki pa e historia tras di Kòrsou su aplikashon pa bira miembro di WTO.
=================================
Nota pa redakshon:
Pa mas informashon por hasi kontakto ku Sekretariado di Komishon Permanente na permanentcommission-itfer@gobiernu.cw