Publiká riba 10 Novèmber 2020
WILLEMSTAD: Resientemente Sentro di Detenshon i Korekshon Kòrsou (SDKK) a hasi apertura di su biblioteka nobo pa tur kliente.
E instituto a tuma tempu pa reorganisá e biblioteka i a hasi uso di ekspertonan di Biblioteka Nashonal Kòrsou ku a yuda krea e kolekshon i tambe katalogisashon.
E kambio di mas grandi ku a tuma lugá ta atkisishon di bukinan mas fásil i atraktivo pa e klientenan lesa. Tin buki na vários idioma i di diferente tema ku ta kuadra ku e klientenan su nivel di estudio.
Meta prinsipal ta pa e bukinan por yuda den formashon i rekreo pa e klientenan.
Gerensia di Biblioteka Nashonal Kòrsou i esun di SDKK a palabrá ku nan ta sigui traha huntu i hasi e kooperashon mas grandi den futuro.
Gerensia di SDKK ker a gradisí Biblioteka Nashonal Kòrsou i tambe Boekenbank Curaçao, ku a hasi donashon signifikante na e instituto.
