Publiká riba 23 Sèptèmber 2021
WILLEMSTAD – Gobièrnu di Kòrsou ta duna honor na nos hendenan. Maske nos ta bibando den e situashon di pandemia pa ku COVID-19, nos hendenan ta briya i saka kara di nos pais. P’esei Gabinete Pisas a invitá tur e atletanan i missnan ku a representá Kòrsou resientemente bin serkanan na Fòrtí pa duna nan un rekonosementu ku nan meresé.
Mayoria di e atletanan a partisipá bou di bandera hulandes, pero kada un di nan ta digno yu di Kòrsou ku tin nan rais kurasoleño. Mayoria di nan ta hóben ku ta sobresalí i a konkistá un medaya olímpiko. Gobièrnu ta duna honor na e atletanan dor di duna kada un di nan un ‘award’ ku nan nòmber grabá riba djé i asina yamanan danki pa nan kontribushon balioso na nos nashon. E aporte di kada un di nan ta pone nos komo pais riba e plano internashonal i ta mustra ku nos tin kapasidat.
Minister enkargá ku deporte, sr. Sithree ‘Cey’ van Heydoorn, a splika ku pa motibu di e pandemia di COVID-19 e selebrashon mester a bai di otro forma ya ku nos ta bibando den un krísis. Pero tòg a pone atenshon spesial na nos atletanan kaminda Konseho di Minister a yama danki i duna honor na e atletanan durante un enkuentro den sala multifunshonal Jerry Lasten (Media Room) na Fòrti.
Na mes momentu a invitá nos representantenan di beyesa ku tambe a sa di konkistá e korona máksimo den luna di ougùstùs último. 
Nan tambe ta digno representante di nos pais. Ta trata aki di Danila Magdalena, Miss Teen Globe International 2021 na Puerto Vallarta, Mexico, Rigene Isenia, Miss Teen Universe 2021 na Nicaragua i Liyanne Hoevertsz, 1st runner up Miss Teen Petite Globe International 2021 na Puerto Vallarta, Mexico. Promé Minister Gilmar Pisas huntu ku henter gabinete a sa di yamanan danki pa pone nos pais briya mas den e área di beyesa.
** pa mas pòrtrèt di e momentu di entrega por bishitá e facebook di Gobièrnu na: Honor na nos mes hendenan
