Publiká riba 24 Òktober 2021
WILLEMSTAD – Resientemente gerensia di Sentro di Detenshon i Korekshon Kòrsou (SDKK) a tuma nota di un informashon publiká den medionan di komunikashon, enkuanto un kliente enkarselá ku a pèrdè 4 dede den prizòn pa motibu di mal kuido.
Gerensia di prizòn ta desmentí i lamentá esaki, debí ku esaki ta hasi daño na imáhen di prizòn i tambe na profeshonalismo di personal di e departamentu médiko.
Gerensia di prizòn ta informá ku a hiba kombersashon ku e kliente tokante e publikashon. E kliente a informá ku ta outoridat a tir’é, ku konsekuensia ku el a bin pèrdè su 4 dedenan durante di su tratamentu médiko na CMC. Pa aklará: for di e kliente su ingreso den prizòn, e kliente tabatin un dede so na su man. Despues el a kontinuá ku su enkarselashon den prizòn, kaminda el a sigui risibí kuido i ningun momento no tabatin asuntu di bichi.
Tambe e kliente a informá gerensia di prizòn ku ta promé biaha ku el a bin Kòrsou. E no tin ningun famia i amigu aki pa por bai medionan di komunikashon ku informashon inkorekto.
Gerensia di SDKK ke enfatisá ku informashon asin’akí por hasi daño tantu na e instituto komo nos pais.
