Publiká riba 23 Yüni 2021
WILLEMSTAD – Riba djasabra 10 di yüli 2021, di 9’or di mainta pa 1’or di mèrdia na Servisio di Tráfiko i Transporte (Parera), ta tuma lugá e elekshon di representantenan pa Komishon di Taksi.
Na òktober aña pasá, manera kada tres aña, a tuma lugá elekshon pa komishonnan di Bùs chikí i mediano, Taksi i tambe Toerwagen según artíkulo 5 di Afkondigingsblad 1969 no. 51. Na e momento ei elekshon pa e komishon di Taksi no a tuma lugá, pa motibu ku no tabatin ningun kandidato ku a keda postulá. Na yüli akí Servisio di Asuntunan Públiko (Kranshi), konforme di lei, ta organisá e elekshon pa taksistanan. Esaki riba petishon di Ministerio di Tráfiko, Transporte i Planifikashon Urbano.
Esnan interesá pa ta kandidato por postulá nan mes no ménos di tres dia promé ku elekshon. Nan mester tin sosten di 10 otro doño di pèrmit di taksi. Kandidatonan mes mester firma pa demonstrá ku nan ta aseptá nan kandidatura. Por tuma e formulario pa entregá kandidatura gratuitamente na Kranshi for di djaluna 21 di yüni 2021.
Taksistanan interesá por entregá nan kandidatura huntu ku un pasfoto pa mas tardá dia 7 di yüli 2021, pa 12’or di mèrdia serka hefe suplente di Asuntunan Públiko sra. Ruthline Haddocks. Despues e Komishon di Elekshon ta kontrolá e rekisitonan entregá. Pa 2’or di mèrdia ta stipulá sekuensia a base di lòt di kandidatonan riba e lista di votashon.
Komishon di Elekshon ta konsistí di: sra. Ruthline Haddocks ku ta hefe suplente di servisio di Asuntunan Públiko, sr. Zino Narvaez i sr. Humphrey Andrade. E personanan akí tin eksperensia ekstenso riba e tereno akí.
Nota pa prensa:
Pa medio di esaki prensa ta kordialmente invitá pa hasi reportahe di e elekshon riba djasabra 10 di yüli 2021.
