Publiká riba 26 Sèptèmber 2022
Willemstad- Tur aña riba 27 di sèptèmber, paisnan rònt mundu ta para ketu na Dia Mundial di Turismo. Tema di e aña akí den kuadro di Dia Mundial di Turismo ta, “Rethinking Tourism’. Komo minister enkargá ku turismo aki na Kòrsou, Minister di Desaroyo Ekonómiko sr. Ruisandro Cijntje huntu ku Ministerio di Desaroyo Ekonómiko (MEO) tambe ta para ketu na e balor i importansia di turismo pa nos komunidat i di ki manera nos tambe ta reformulando nos sektor turístiko ku mira riba futuro.
Den kuadro di Dia Mundial di Turismo, ta importante pa e aña akí nos para ketu na e tremendo rekuperashon di nos sektor turístiko despues di e impakto di Pandemia di COVID 19. Te ku awor, turismo ya a konosé un kresementu di 101% en komparashon ku aña 2019. E kresementu di e aña akí, a yega kaba na 93% di e meta ku Ofisina di Turismo (CTB) a stipulá pa 2022 i ta proyektá ku esaki lo surpasá e proyekshon ku 25%. Turistanan for di e merkadonan Merikano i Hulandes ta esnan ku mas a kontribuí te ku awor na e kresementu akí. Entre otro dor di apertura di e hotèl di renombre internashonal, Sandals Royal Curaçao den luna di yüni último pero tambe e impakto di nos merkadeo den Oropa, Nort Amérika, Latino Amérika i Karibe.
Mas ku klaro no por keda sin duna balor na e aktividatnan promoshonal impagabel ku Kòrsou ta risibí konstantemente pa medio di nos talentonan lokal ku ta karga e nòmber di nos pais na haltu durante diferente torneo di deporte internashonal, sertámennan di beyesa internashonal, presentashonnan musikal, produkshon di pelíkula i arte.
Banda di esakinan, tin masha hopi proyekto den diferente área di e sektor turístiko aki na Kòrsou ku ta yuda hasi nos turismo sumamente atraktivo. No solamente pa e turista ku ta bin bishitá nos pais pa dibertishon, pero tambe esun ku ta bini komo un nomade, esun ku ta bin pa invertí i mas ku klaro nos mes hendenan lokal tambe por disfrutá siendo un turista den nos propio pais. Algun di e proyektonan akí ta entre otro e promé fase di e desaroyo di Zakitó (koredor) i apertura di e parke Mangrove. Un kontribushon sin mas balioso den e desaroyonan den turismo, ta proyektonan privá di invershonistanan Yu Di Kòrsou. Por menshoná aki proyektonan manera apertura di Hòfi Mango, konstrukshon di Harbor Hotel (ántes Hotel Otrabanda) i aktividatnan sosial grandi manera Kaya Kaya ku ta un atrakshon kultural i kreativo ku ta hala tantu hendenan lokal komo bishitantenan. Introdukshon di buelonan charter ku Kòrsou komo destinashon, reanudashon di buelonan anterior i ampliashon di buelonan eksistente tambe a yuda kontribuí grandemente na e kresementu turístiko ku nos ta mirando te ku awor.
Riba Dia Mundial di Turismo mas ku nunka, Minister Cijntje huntu ku MEO ta para ketu na e potensial enorme ku turismo tin pa e ekonomia di nos pais. E perspektiva ta, pa sigui strukturá, stimulá, reformulá i elevá nos turismo pa e por sigui duna fruta den añanan benidero. Minister Cijntje huntu ku MEO lo sigui invertí den inisiativanan ku ta alsa e kalidat di nos produkto turístiko, diversifiká ku áreanan (niche) nobo manera p.e. turismo médiko, eco-turismo, turismo di yachting, turismo komunitario i tambe turismo pa eventonan.
