Publiká riba 25 Novèmber 2022
Willemstad- Den kuadro di desaroyonan riba kalidat di kombustibel na Kòrsou, Minister di Desaroyo Ekonómiko, Ruisandro Cijntje, resientemente a kondusí un destaho públiko. Meta di e destaho públiko akí tabata, pa skohe un kompania imparsial ku lo por ehekutá un estudio aktualisá riba normanan di kalidat di tantu Mogas 95 (gasolin) komo LSD (diesel) na Kòrsou.
Na final di e proseso di e destaho públiko, e kompania Aleman SGS INSPIRE ta esun ku a keda selektá pa ehekutá e estudio mirando nan konosementu, kapasidat i eksperensia amplio den e merkado di kombustibel. Konforme planifikashon, SGS INSPIRE a start ku entrevistanan na Kòrsou entrante 22 di novèmber último i ta spera di finalisá e parti akí pa djamars 29 di novèmber próksimo. Durante e periodo aki, e kompania lo entrevista diferente stakeholders ku ta forma parti di e kadena di kombustibel, pa asina yega na rekomendashonnan ku ta wòrdu karga dor di tur esnan partisip’é den e trayekto.
Tambe, ta e intenshon pa SGS INSPIRE bishitá e instalashonnan den kadena di balor di kombustibel aki na Kòrsou durante e dianan akí i formulá e diferente parameternan nesesario.
SGS INSPIRE ta premirá ku e durashon total di e estudio lo ta mas o ménos tres luna, teniendo kuenta ku e periodonan di vakashon benidero, di tal forma ku pa fin di luna di febrüari 2023, ta risibí e rekomendashonnan final di SGS INSPIRE tokante di e kalidat di Mogas 95 i LSD na Kòrsou.
E grupo di trabou tras di e estudionan akí, ta konta ku representashon aktivo di Ministerio di Desaroyo Ekonómiko (MEO), Ministerio di Salubridat Públiko, Medio Ambiente i Naturalesa (GMN), Curoil ku ta e provedor eksklusivo di Mogas 95 i LSD na Kòrsou, Bureau Telecommunicatie & Post (BTP),huntu ku Curaçao Heavy Equipment Association (CHEA), Sindikato Transporte Uni (STU), Curaçao Car Dealers Association (CCDA) i representantenan di pòmpnan di gasolin (entre otro AsoGas, COPDA i Vanddis). Ministerio di Desaroyo Ekonómiko ta sigui informá pueblo di e progreso den e trabounan pa aktualisá e normanan nesesario, ku e meta prinsipal, pa e suministradó por garantisá un kalidat di kombustibel adekuá pa uzo lokal.
