Publiká riba 09 Novèmber 2020
WILLEMSTAD – Reda Sosial huntu ku Gobièrnu di Kòrsou, den koperashon estrecho ku Funditut, ta mira bèk riba kurso eksitoso di e proyekto ManÚniko na Obra. Resientemente Minister Presidènt Eugene Rhuggenaath, Minister Hensley Koeiman, direktor di Reda Sosial i direktor di Funditut a hasi entrega di sertifikado na e graduadonan ku a finalisá e promé parti di e kurso, kual a tuma lugá durante e último 3 lunanan. Alabes, a duna palabranan di elogio i felisitashon na kada un di e graduadonan, kende a sa di surpasá kontratiemponan ku a presentá dor di COVID-19 i a skohe pa ta resiliente dor di siña un fishi nobo. Por a nota ku e dosentenan ku a duna e kurso tabata sumamente satisfecho ku e manera ku kada graduado a krese, tantu den nan desaroyo artístiko komo esun personal.
E kurso ManÚniko na Obra ta un proyekto di Funditut kual a keda finansiá ku fondonan di Strategia di Kresementu pa Kòrsou. E ta un di e proyektonan ku ta forma parti di e Agènda pa Desaroyo Sosial “Kai, lanta i Sigui”. E proyekto tin e meta pa yuda hendenan muhé entre 18 i 30 aña siña un fishi nobo, hasiendo uso di nan mannan. Ta trata por ehèmpel di hendenan ku lamentablemente a pèrdè trabou durante e periodo di ‘lockdown’ relashoná ku COVID-19. Durante e kurso nan a siña e parti básiko di krea diferente artesania, manera entre otro kon pa traha ophetonan ku klei trahá di tera kombiná ku awa i maisena. Ademas di e parti práktiko, a enfoká hopi riba nan desaroyo personal. Durante e próksimo lunanan e graduadonan lo siña kon nan por kuminsá nan propio negoshi ku e konosementu atkerí.
Minister Eugene Rhuggenaath a duna un palabra di animashon na e partisipantenan, indikando ku esaki ta djis e base i e komienso di un futuro briante pa kada un. El a indiká ku apesar ku tin retonan ekonómiko aktualmente, tòg ta importante pa nan komo graduadonan sigui desaroyá nan mes i krea artesanianan úniko ku ta reflehá e bunitesa di nos pais i kultura. Turistanan ku ta bishitá Kòrsou tin hopi interes den tipo di artesania lokal.
Minister Hensley Koeiman na su turno a enfatisá e oportunidatnan ku trabou di man por ofresé pa hende por progresá i bai dilanti den bida. E minister a bisa ku esaki por ta un oportunidat úniko pa e graduadonan sigui pa dilanti. Finalmente el a elogiá tambe e dosentenan ku ta duna e kursistanan e kurso.
Gobièrnu di Kòrsou ta yama pabien na Rayshenice Provacia, Darwinella Asjes, Astrid Eustacia, Ninaiska Pieternella, Genesis Riley, Supharmy Fecunda, Diana Prada Torres i Daphney Accean pa e logro bunita aki i ta deseá nan tur klase di éksito pa futuro. Preparashonnan pa e siguiente kurso ManÚniko na Obra ta den ‘full swing’ i Funditut ta spera di por kuminsá trein ku un grupo nobo na fin di novèmber. Personanan ku ta interesá por tuma kontakto ku Funditut na number di telefòn 737-9280 òf 512-0687.
