Publiká riba 21 Sèptèmber 2022
WILLEMSTAD – Directie Risicobeheersing & Rampenbeleid (DRR) pa di 5 aña konsekutivo ta organisá e ‘Basis & Verdieipingscursus Evenementenveiligheid / Crowd Management’. Pa promé aña tambe a organisá e ‘Gevorderdencursus Evenementenveiligheid / Crowd Management’.
E kursonan a ser duná dor di representantenan di MOJO Concerts (Hulanda), The Security Company i ku input di Brantwer Kòrsou i Korps Politie Curaçao (KPC). Esaki a sosodé bou di kordinashon i guia di Directie Risicobeheersing & Rampenbeleid di Ministerio di Asuntunan General, kual ta e direktorado ku na nòmber di Minister di Asuntunan General ta enkargá ku maneho, kordinashon i supervishon di tareanan pa ku krísis i desaster na Kòrsou.
Durante e kursonan kursistanan a siña kon pa halsa seguridat na evenementonan di sierto magnitut, kaminda tin un aglomerashon grandi di persona ku por forma un potensial riesgo òf kalamidat (manera identifiká den e profil di Riesgo di Kòrsou). Pero tambe kon pa traha un plan di seguridat indikando kua ta e ‘best practices’ pa tene kuenta kuné durante un evenemento i tambe kon instansianan di gobièrnu i instansianan privá por traha konhuntamente den kuadro di evenementonan grandi pa halsa e seguridat.
Alabes durante e kursonan a enfoká riba kon komuniká na e manera mas adekuá interno òf eksterno den un situashon ‘normal’ òf un situashon di krísis. A para ketu i a profundisá riba kua ta e medidanan preparativonan ku por tuma i kua ta e mihó manera pa instruí un públiko grandi na un evenemento, kon pa usa medionan sosial mas efisiente pa komuniká i kon pa kombatí ‘fake news’.
Na total 84 sertifikado a ser otorgá na representantenan di e.o. Fundashon Desaroyo Deportivo Kòrsou – FDDK, Korps Politie Curaçao, Brantwer Kòrsou, Uivoeringsorganisatie Cultuur & Sport, T xperience, Lions Dive Beach Resort, Marriot Beach Resort, Strong Security & Arbeidsinspectie, Securitas, Operationele Beveiligingsdienst, Brigada di Seguridat i Formashon i Directie Risicobeheersing & Rampenbeleid. Den transkurso di e 5 añanan ku e kurso ta ser organisá, ya 235 kursista a risibí e training akí huntu ku nan sertifikado.
DRR ta felisitá tur kursista ku a sigui e kurso di ‘Evenementenveiligheid / Crowd Management’. Pa keda informá por bishitá www.kalamidat.cw òf página di Facebook: RisicobeheersingCuracao
