Publiká riba 10 Sèptèmber 2020
Kerido pueblo,
Manera mi a primintí boso, awe mi ke duna un ‘update’ tokante kon kosnan ta kanando ku nos kombersashon ku Hulanda, den kuadro di e ayudo ku Hulanda a ofresé na nos.
Siman pasá nos a logra, manera boso ta na altura kaba, un apertura importante den e kombersashonnan ku nos a bin ta hiba ku Hulanda. Danki na nos esfuerso i insistensha pa sigui sinta na mesa, nos a logra e apertura importante aki. Mi ta konvensí ku esaki ta e úniko forma, esta sinta na mesa i dialogá, pa huntu nos logra progreso.
Mi ta sigur ku nos tur ta di akuerdo ku nos MESTER perkurá pa nos komunidat superá e retonan ku nos ta konfrontando. E retonan aki ta bira mas eminente pa motibu di e pandemia di Covid-19 ku mundu ta pasando aden. Gobièrnu tin un obligashon pa sigui duna e sosten nesesario na nos pueblo. Miéntras nos ta traha pa krea espasio pa rebibá nos aktividatnan ekonómiko i krea kuponan di trabou, Gobièrnu su debernan primordial pa ku nos pueblo ta pa 1) garantisá seguridat, derecho riba protekshon di lei i di derecho humano. I nos tin ku salbaguardiá esei.
Ta un bèrdat ku nos no por hasié nos so na e momentunan aki. Nos mester di sosten finansiero, anto urgente. E loke nos tin awor akí ta e oferta di Hulanda, di kua Hulanda a mara na e kondishonnan konosí.
Laga mi bolbe suprayá ku pa loke ta e asina yamá “Landspakket” Kòrsou, no tin masha opheshon pa ku e proposishonan. E “landspakket” ta reflehá den liña grandi loke Kòrsou mes a proponé den su Strategia di Kresementu i seguidamente den e programa pa sobrepasá (transishon) i reformá (overbruggings- en hervormingsprogramma).
E kombersashonnan di e último dianan ku Hulanda ta netamente tokante di e entidat di reforma, esta e Caribische Hervormings Entiteit (CHE). E kombersashon ta spesialmente tokante te kon leu e proposishon di lei aki ta pas den nos leinan i e nivel di outoridat (‘bevoegdheden’) di e entidat di reforma aki. Esei ta bai via e Lei di Reino (rijkswet), su nota di aklarashon i e “Landspakket” mes.
For di djabièrnè último nos ta den kombersashon mas intensivo ku e representantenan Hulandes pa wak kon nos ta logra yega mas serka di otro.
E tipo di kòmbersashonnan aki no ta fásil. Nan ta hopi kompliká i tékniko i nos deseo ta pa e kombersashonnan aki tuma lugá den un ambiente konstruktivo.
Ta kumbiní nos, esta Kòrsou, pa esaki tuma lugá den un ambiente pasífiko. No laga ningun hende kita nos for di nos enfoke. Nos sa kiko ta nos nesesidat, kiko ta loke nos ke logra pa Kòrsou, kiko ta nos debernan i kiko ta nos derechi. Nos ta pidi espasio pa por sigui ku kombersashonnan.
Pues mi ke hasi un apelashon na kada un di boso pa laga nos tene kabes friu. Nos ta konsiente ku tin hopi preokupashon ta biba den nos komunidat pa ku henter e asuntu aki. Permití nos sigui na mesa di negosashon miéntras aki na kas ta hala mara huntu pa un kousa: esun di nos pueblo. Laga nos UNI. Si nos ke krea un lus na horizonte, e ta den nos mes man; den nos aktitut, nos akshonnan i perseveransia.
Mi lo sigui informá boso tokante resultado di e kombersashonnan.
