Publiká riba 23 Yüni 2020
WILLEMSTAD – Manera a keda anunsiá anteriormente e portal pa hasi petishon di sosten pa empresarionan individual (TBZO) a sera ofisialmente djadumingu último, dia 14 di yüni. Mientrastantu Ministerio di Desaroyo Ekonómiko (MEO) lo kontinuá ku e trabounan pa asina kompletá tur petishon risibí. Empresarionan individual ku a hasi petishon pa sosten promé ku e fecha di klousura i ku ta bini na remarke, lo risibí esaki pa lunanan di aprel, mei i yüni.
Apesar ku aplikashon pa e sosten na empresarionan individual a sera djadumingu último, ainda tin informashon ku no ta bon kla pa e empresario. Pa e motibu ei MEO ta aklará lo siguiente. Komo esun enkargá ku implementashon di pago di sosten finansiero na empresarionan individual, MEO ta konsiente ku na inisio di e proseso pa duna sosten finansiero, tabata eksistí hopi konfushon tokante kua tipo di sosten ta aplikabel den kua situashon. A konsekuensia di esaki tabatin empresarionan individual ku eróneamente a apliká via di por ehèmpel SOAW òf e portal di MiNegoshi. Mirando esaki MEO a disidí ku empresarionan individual ku despues a entregá nan petishon tòg via e portal di Fondo di Sosten i ku ta kumpli ku tur eksigensia i rekisito nesesario, lo risibí tur tres luna di e sosten igual na tur otro empresario individual. Pa loke ta trata e empresario individual ku tin un NV/BV sin personal i ku tin por lo ménos 50% di akshon den e empresa konserní, tambe lo por bini na remarke pa risibí sosten pa tur tres luna ariba menshoná.
Si akaso ta trata por ehèmpel di 2 empresario ku konhuntamente ta manehá e mesun kompania, solamente un di nan lo por risibí e sosten mirando ku aki ta trata di un solo empresa. Pues den kualkier kaso ku tin dos doño kual ámbos ta karga 50% di akshonnan di e mesun empresa, solamente un di e doñonan lo risibí e sosten na momentu ku e petishon ta kumpli ku tur rekisito nesesario. Den un kaso asin’akí, lo duna e doñonan mes e eskoho pa indiká na MEO ta kua di nan dos lo risibí e sosten finansiero.
Manera anunsiá anteriormente, tur empresario individual kual nan petishon tabata falta dokumento i/òf informashon, a risibí un e-mail den kua tin un link pa kompletá e petishon. Pues un apelashon ta bai na tur empresario individual ku ainda ta wardando pa risibí sosten, pa por fabor kontrolá nan e-mail i kompletá e petishon mas pronto posibel, ya ku esaki ta nesesario pa MEO por kaba di prosesá tur kos debidamente.
