Lusnan di tráfiko na altura di krusada Abraham de Veerstraat ta for di servisio pa tempu indefiní
Publiká riba 27 Febrüari 2021
Willemstad – Servisio pa Obra Públiko (OW) ta informá ku debí na problemanan tékniko e lusnan di tráfiko na e krusada Abraham de Veerstraat/De Ruyterkade/Abraham Mendez Chumaceiro Boulevard no ta funshoná. E lusnan na e krusada aki pa un tempu kaba ta defekto i téknikonan tabata trahando duru pa solushoná e problema. No por a logra esaki i a yega na e konklushon ku mester remplasá e outomaat na e krusada enkuestion.
Mientrastantu ku e trámitenan ta tuma lugá pa haña un otro outomaat, e lusnan di tráfiko na e krusada Abraham de Veerstraat/De Ruyterkade/ Abraham Mendez Chumaceiro Boulevard ta keda for di servisio. Esaki lo ta pa un tempu indefiní.
Servisio pa Obra Públiko ta pidi outomobilistanan pa tene bon kuenta ku esaki i kore ku koutela.
