Publiká riba 12 Sèptèmber 2022
WILLEMSTAD – Komishon Emblema Nashonal pa Kòrsou ta gradisí tur persona ku a partisipá na kreashon di un Emblema Nashonal pa Kòrsou! E diseñonan ku a keda risibí ta mustra un konekshon grandi ku nos isla i ta fortifiká esaki. E miembronan di e komishon ta impreshoná ku e kreatividat i dedikashon ku hopi di e diseñonan ta reflehá. Esaki a hasi e selekshon di e tòp 10 èkstra difísil. Pero a base di e kriterianan i prosedura ku a palabrá, e komishon a selektá e tòp 10 ku ta bai final. Tur e otro partisipantenan ku no a kai den e tòp 10 a risibí un e-mail kaminda ta gradisí nan pa nan kontribushon.
Entretantu e outornan di e diseñonan selektá a risibí un yamada pa kuminsá traha konhunto ku un diseñadó gráfiko. Tambe a pidi e personanan den e TÒP 10 pa keda diskreto di forma ku por finalisá e trayekto den e forma palabrá. Na final di e kolaborashon entre outornan i diseñadó, e TÒP 10 lo keda publiká riba kanalnan di media sosial di Gobièrnu pa asina inisiá e proseso di votashon.
E votashon kaminda tur hende ta haña oportunidat di skohe nan diseño fáborito online a keda posponé pa dia 20 di sèptèmber. Pues aki 1 siman tur hende ku ta biba na Kòrsou por vota pa nan Emblema Nashonal fáborito riba www.emblema.cw.
