Publiká riba 10 Mart 2021
WILLEMSTAD- Gobièrnu di Kòrsou a tuma nota di publikashon riba medionan sosial tokante resultadonan di tèst pa COVID-19 na dos diferente laboratorio lokal. Unu a sali positivo i e otro a sali negativo. Riba esaki, Gobièrnu ta reakshoná di e siguiente forma:
E mésun persona a tèst pa COVID-19 na dos diferente laboratorio, esta Lab de Med i ADC. E tèst na ADC a tuma lugá dia 5 di mart i esaki a sali positivo. E tèst di Lab de Med a tuma lugá dia 6 di mart i esaki a sali negativo. Pues, e fechanan ku a tuma e tèst ta diferente. Por tin diferente splikashon médiko pa e diferensia akí.
Esaki por nifiká por ehèmpel ku e persona tabata positivo den pasado sin ku e ta sa, i ku awor a detektá esaki na fin di e kontagio ora e posiblemente no ta kontagioso mas. Un otro posibel motibu por ta ku hustamente e persona ta den komienso di e malesa, ku ta pone ku e kantidat di vírùs te ainda ta muchu abou pa por detektá esaki.
E diferensha tambe por ta debí na e manera ku e muestra a ser tumá. Aparte di esaki, kada laboratorio tin tambe nan propio plataforma diferente ku ta tèst aspektonan di COVID-19. Kualke ku por tabata e kaso, no por saka ningun konklushon for di 2 tèst tumá riba diferente fecha i ademas analisá riba diferente plataforma di tèst.
E desishon pa bai hasi otro tèst na un otro laboratorio no ta kuadra ku maneho di Departamentu di Epidemiología (EPI) i pues no ta posibel pa kompará e resultadonan akí ku otro sin mas. Nos ta enfatisá ku un hende ku a tèst positivo netamente mester keda den isolashon i no sali bai otro kaminda pa posiblemente buta otronan na peliger di kontagio.
Manera a indiká ariba, mester tene kuenta ku e posibilidat ku e persona envolví ta positivo. P’esei EPI a alertá koleganan na Bonèiru pa nan sigui monitoriá esaki, pa motibu ku e persona konserní a bula bai einan.
Por último, mester enfatisá ku resultadonan di laboratorio no ta responsabilidat di Gobièrnu. Gobièrnu no tin ningun motibu pa duda kalidat di e tèstnan hasí na kualkier di e laboratorionan ku nos tin aki na Kòrsou. Interpretashon di resultadonan mester keda tarea di profeshonalnan konserní i – den kaso di duda – persona i gruponan den komunidat mester konsultá primeramente ku e profeshonalnan akí. Tin biaha, resultadonan ta kompliká pa interpretá. Den un kaso manera a presentá, ta netamente a traves di sigui vigilá i hasi un tèst di nobo despues di algun dia, lo por yega na konklushonnan mas adekuá.
