Publiká riba 09 Desèmber 2019
WILLEMSTAD- Den un desishon fechá 04 di desèmber último, Konseho di Minister a bai di akuerdo pa prolongá e periodo di transishon ku a keda palabrá ku doñonan di standplaats permanente pafó di sentro di siudat na kuminsamentu di e aña aki. E periodo di transishon awor lo kore te ku djadumingu 15 di mart 2020 pa asina duna espasio pa tur doño di standplaats por kumpli debidamente ku e loke ta stipulá den e maneho di standplaats.
A base di un dekreto ministerial fechá aprel 2016 (P.B. 2016, nr. 17),Ministerio di Desaroyo Ekonómiko (MEO) konhuntamente ku Ministerio di Tráfiko, Transporte i Desaroyo Úrbano(VVRP), a hasi inventarisashon di tur standplaats eksistente pafó di sentro di siudat, adaptá e kriterionan pa otorgashon di standplaatsvergunning nobo i tambe traha riba kontenido di un mihó maneho di standplaats.
Den e maneho aki ta indiká entre otro e kriterionan pa ku seguridat i mantenshon di órden públiko, pero tambe kriterionan ku e standplaats mester tene su mes na dje pa loke ta trata por ehèmpel midínan permití i tambe ta stipulá ku e vehíkulo pa kua e pèrmit a keda otorgá mester keda mobil.
Na e momentunan aki tin un total di 89 standplaats pafó di sentro di siudat, kual nan ta entre otro trùknan di batido, trùk di hòdòk, trùknan di pan èts. Den transkurso di tempu, pa entre otro falta di maneho i kontrol, diferente di e standplaatsnan aki a stabilisá nan mes na e lokalidat na unda nan ta situá i tiki tiki a bira inmóbil na e lokalidat aki. 
Ku introdukshon di e maneho pa standplaats pafó di sentro di siudat, MEO a hasi su esfuerso pa reuní personalmente ku doño di e 89 standplaatsnan eksistente pa asina presentá e kontenido di e maneho i kiko esaki lo mester nifiká pa e diferente standplaatsnan, pero tambe pa kontesta posibel preguntanan ku e empresarionan aki lo por tabata tin riba e maneho. Premirando e kambionan, MEO a reuní ku tur doño di un pèrmit di standplaats na desèmber di aña pasa pa pone nan na altura di esakinan.
Durante e reunion a duna doñonan di standplaats un aña di tempu pa por drecha nan lokalidat di akuerdo ku loke tin stipulá den e maneho pa standplaatsnan pafó di sentro di siudat. Na inisio di aña a reuní individualmente ku kada un di e empresarionan aki i durante aña a publiká diferente aviso i komunikado di prensa komo rekordatorio riba e palabrashon hasá. Tambe tim di inspekshon di e ministerio a pasa laga un rekordatorio personal na e negoshinan en kuestion pa asina duna e komersiante e espasio pa por drecha lo nesesario.
Mirando ku e término di un aña ku inisialmente a keda duná ta serka di yega su final a bolbe reuní personalmente ku e komersiantenan resientemente. Apesar di tur esaki solamente 23 di e lokalidatnan di standplaats eksistente ta kumpli aktualmente ku e maneho. Di e 66 lokalidatnan ku ainda ta den inkumplimentu, a duna 17 di nan e posibilidat pa por kambia nan pèrmit i pidi pa un pèrmit di HORECA ku lo duna nan e posibilidat di por sigui operá manera nan a bin ta hasi últimamente.
En bista ku ainda mayoria di e lokalidatnan di standplaats eksistente no ta kumpli ku loke tin stipulá den e maneho pa standplaatsnan pafó di siudat i no a hasi petishon pa un kambio di pèrmit, Konseho di Minister riba petishon di Minister Mc William a bai di akuerdo ku un prolongashon di e periodo di transishon te ku 15 di mart 2020. Despues di e fecha aki tur standplaats mester ta kumpli ku e loke a keda stipulá den e maneho mirando ku ya lo no por bai bolbe alargá e periodo.
Tur esnan interesá lo por deskargá i lesa e maneho di standplaats aki den su totalidat riba wèpsait di Gobièrnu di Kòrsou; www.gobiernu.cw.
