Publiká riba 15 Yüli 2021
WILLEMSTAD – Durante di e konferensha di prensa riba djaweps 15 di yüli, Minister Dorothy Pietersz-Janga di Salubridat Públiko, Medio Ambiente i Naturalesa, a reakshoná riba e komentarionan ku último tempu ta sirkulando riba retnan sosial i den media relashoná ku su aparente apstenashon pa kontestá e pregunta tokante ta bakuná òf nò. Di forma konsiso i direkto Minister Pietersz-Janga a informá komunidat i klarifiká su posishon riba mantenshon di privasidat di datonan personal riba kua su akshonnan ta basá. Den e kuadro akí, minister for di promé instante a duna di sa bon kla ku e maneho eksistente di Gobièrnu di Kòrsou pa ku COVID-19 i bakunashon ta i lo keda meskos. Sinembargo, manera Gobièrnu a bin ta hasi for di prinsipio, ta keda duna siudadanonan e oportunidat pa ta liber den nan eskoho pa bakuná i tambe ta bai pone awor mas énfasis riba e aspekto di privasidat.
Komo médiko praktikante na Kòrsou pa 30 aña kaba, Minister Pietersz-Janga ta basa su rasonamentu pa balorá i pues mantené su mes na privasidat di datonan médiko personal, riba leinan eksistente ku ta forma e base fundamental pa e asina yamá konfidensialidat entre médiko i pashènt. Esaki ta enserá ku komo médiko bo ta, pa lei, obligá pa no dibulgá ni kompartí ningun dato medíko personal di bo pashèntnan, a ménos ku un pashènt a duna outorisashon pa esaki. Esaki no ta enserá solamente e kantidat di bia ku por ehèmpel ta mèldu ‘ziek’, pero tambe e tipo di malesa(nan) ku un pashènt por tin i posibel tratamentu(nan) ku e persona mester hasi serka sierto spesialista.
E informashon si un persona ta bakuná òf nò, tambe ta kai bou di e kategoria di datonan médiko ku mester keda tené privá. Konsekuentemente niun siudadano, inkluso minister mes, ta obligá pa informá otro hende, organisashon òf instansia tokante su estado di bakunashon. Tampoko e persona ta obligá pa hustifiká su desishon pa ku esaki. Di e forma akí pues, Minister di Salubridat ke mustra riba e nesesidat i importansia pa respetá kada hende su desishon i pa evitá kualke forma di posibel diskriminashon relashoná ku esaki.
Den esaki e maneho di Gobièrnu eksistente pa tuma tur medida di salú i di bakunashon nesesario ta keda e punto di salida, kaminda lo keda hasi tur esfuerso pa buska un balansa entre e interes kolektivo i kumplimentu di e diferente leinan na benefisio di e individuo. Pa esaki Gobièrnu di Kòrsou, en partikular Ministerio di Salubridat Públiko, Medio Ambiente i Naturalesa, den e periodo benidero lo bai duna mas kontenido na e.o. ehekushon efektivo i efisiente di e sistema di kontrol den establesimentunan, na evento i aktividatnan.
