Notisia

Señora Presidente, honorabel miembronan di Parlamento,

Pa aña parlamentario 2022 – 2023, gobièrnu ta determiná na hiba un maneho ku pueblo di Kòrsou ta sostené. Den tur aspekto, esaki ta eksigí un aserkamentu ku mester  ta transparente pa nos pueblo. E pandemia di Covid-19, ya pa mas ku dos aña tin mundu kompletu den su gara. Mundialmente el a kousa un krísis drástiko tantu sosiokultural, ekonómiko, komo finansiero. Ya promé ku komienso di e pandemia di Covid-19, Kòrsou tabatin di ber ku un impase i hasta ku un kremp ekonómiko kresiente. E promé aña di e pandemia a eksponé Kòrsou su vulnerabilidatnan sosial-ekonómiko klaramente, i den hopi kaso hasta a empeorá esakinan.

Gobièrnu ta konsiente ku sin intervenshon, e spiral negativo a konsekuensia di Covid-19 lo no yega na un fin. Pa por restablesé e fundeshi sosial i ekonómiko, ta nesesario hasi reforma struktural. Gobièrnu lo goberná ku e konvikshon ku huntu nos lo sali padilanti i triunfá. Pueblo di Kòrsou ta fuerte, orguyoso, sólido i resiliente. Nos lo sali padilanti komo un famia, un pais, un Kòrsou.

• Na nivel polítiko, esaki ta eksigí konsentrashon i abilidat pa tuma desishon.
• Na nivel di kuerpo di ámtenar, esaki ta eksigí kurashi i vigor pa aktua.
• Na nivel di komunidat, esaki ta eksigí fe i perseveransia.

Gobièrnu lo sòru pa semper interes di pueblo ta na promé lugá. Gobièrnu lo  empoderá e mayor potensial ku nos pais tin di brinda, esta …  ‘NOS HENDENAN’! Nos lo duna tur di nos parti, pa krea oportunidat pa poblashon di Kòrsou.

Na nivel di Reino, Gobièrnu konhuntamente ku gobièrnu di Hulanda lo sigui buska posibilidatnan pa implementá e reformanan ku ta nesesario di un forma duradero den kolaborashon ku Reino.

Señora Presidente,

Gobièrnu lo hasi todo por todo pa sigurá ku abitantenan, kompanianan i organisashonnan no-gubernamental ta produktivo, di moda ku nan por kontribuí na nos pais i na e gruponan mas vulnerabel den nos komunidat. E lema pa e periodo di gobernashon 2022 te 2025 i tambe pa aña parlamentario 2022 te 2023 ta: “Un gobernashon di pueblo, pa pueblo i huntu ku pueblo di Kòrsou; ta pueblo su bùrt”.

Ku e lema aki gobièrnu ke garantisá regenerashon pa Kòrsou den e sentido mas amplio di palabra, i un mihó kalidat di bida pa pueblo henter.

Señora Presidente,

Durante e aña parlamentario akí Ministerio di Asuntunan General lo enfoká riba metanan stratégiko en konekshon ku fortifikashon di estado di derecho. Lo praktiká efektividat den asuntunan eksterior, inklusividat na ora di informá i komuniká lo demostrá  unidat di maneho i un atministrashon di riesgo bon planifiká. Den e aña parlamentario akí tambe Ministerio di Asuntunan General ta aspirá na tin un maneho transparente, konfiabel i konsistente.

Riba tereno di estado di derecho ya ta hasiendo gran esfuerso pa sigui konsolidá mas di e tekstonan di lei ku ‘Pais Kòrsou’ a heredá na 10-10-10. Otro punto ku mester resaltá ta,  ku lo sigui invertí pa krea mas ‘hurista legislativo’ pa den futuro por hasi mas na modernisashon di nos leinan i alabes kumpli ku e kambionan di lei nesesario, na benefisio di e reformanan ku nos pais ta rekerí.

Ta di mashá importansia fortifiká laso ku otro pais- i organisashonnan internashonal. Pa hasi e distansianan entre e paisnan den Reino Hulandes mas kòrtiku, lo fortifiká e lasonan ku Hulanda, Aruba, e islanan BES i Sint Maarten. Den e kuadro akí, énfasis lo ta prinsipalmente riba rèspèt mutuo pa por logra metanan ku ta benefisiá nos pueblo.

Pa alkansá e metanan menshoná, lo hasi uso di tur método di komunikashon, pa e informashon ku Gobièrnu tin yega serka komunidat i otro gruponan ku ta rekerí esei. Lo enfoká riba bon komunikashon interno i eksterno.

Lo invertí mas den forma pa enfrentá kalamidat. Lo invertí den un edifisio moderno ku por duna e garantia nesesario ku seguridat di nos Pais lo ta salbaguardiá durante un eventual kalamidat i ku tambe prosesonan diario lo por sigui mas normal posibel.

Ministerio di Gobernashon, Planifikashon i Servisio Públiko.

Kòrsou ta un pais ku hopi potensial, i a bira tempu pa gobièrnu promové i sostené aktivamente inisiativanan ku surgi den nos pueblo. Pa realisá e promoshon i sosten akí Ministerio di Gobernashon, Planifikashon i Servisio Públiko tin riba agènda…, desaroyá un aparato públiko moderno, aksesibel i útil,  loke lo kontribuí na duna komunidat servisio optimal.

Un di e medionan pa logra e meta akí ta via digitalisashon i outomatisashon interno i eksterno. Servisio na nos komunidat mester sosodé di un forma efikas i di forma digital. Lo tene kuenta tambe ku esnan den nos komunidat ku ainda no tin akseso na e  fasilidatnan tékniko. Gobièrnu mester di e fondonan nesesario pa por logra invertí den digitalisashon.

Nos ámtenarnan ta hunga un ròl krusial den komunidat. Un ròl ku ta rekerí fleksibilidat  i abilidat pa manehá strès. Hopi bia nos no ta kòrda riba importansia di e grupo akí. P’esei gobièrnu ke hasi uso di e oportunidat akí pa gradisí tur nos ámtenarnan ku ta traha diariamente ku alma i kurpa pa hiba nos pais dilanti. Gobièrnu lo trata pa yega na kondishonnan agradabel pa nos ámtenarnan traha, i duna oportunidat pa kada ámtenar sigui ekstendé su kapasidat. Esaki lo reflehá den e edifisionan di gobièrnu ku lo ta moderno i sólido. Gobièrnu lo usa e konosementu i eksperensia atkirí durante e periodo di COVID-19, di traha fo’i kas, pa implementá e sistema akí tambe ora ta adaptá nos edifisionan. Gobièrnu lo sigui traha pa pone e persona korekto funshoná na e lugá korekto. Lo modernisá e maneho di mobilidat pa di un manera mas fásil por hasi uso di e talento i kapasidat di e empleado públiko. Gobièrnu lo invertí den e ámtenar, brindando diferente aktividat pa amplia konosementu i desaroyo personal. E aña aki atrobe a start ku un programa pa fortifiká e área di legislashon. Lo traha riba konosementu i e abilidat básiko nesesario pa duna mihó servisio.

Otro faktor ku Ministerio di Gobernashon, Planifikashon i Servisio Públiko ta traha ariba ta, un struktura renobá ku ta sirbi pa fasilitá un mihó servisio. E aña akí a traha riba adaptashon di e struktura di ‘topkader’. Lo sigui despues ku revishon di sobrá di e organisashon.

Aksesibilidat na data ta krusial pa un maneho efikas di sirbi nos komunidat mihó. Den e kuadro akí Ministerio di Gobernashon, Planifikashon i Servisio Públiko ta perfekshonando e modelo di ‘National Statistical System’ (Esta e sistema nashonal di estadístika).

Aña 2023 lo bira un aña di kambio. Ministerio di Gobernashon, Planifikashon i Servisio Públiko ta e kurason di e aparato públiko i, e mester kuminsá funshoná komo tal. No pa medio di rapòrtnan, sino mediante akshon! Un aparato públiko efikas i stabil, ta un di e kondishonnan prinsipal pa finansa públiko sostenibel i kresementu struktural di nos ekonomia.

Ministerio di Desaroyo Ekonómiko

E krísis di Corona a eksponé e vulnerabilidatnan di Kòrsou su ekonomia i a mustra riba nos dependensia riba faktornan eksterno komo ekonomia chikitu i habrí. Aparte di e pandemia, e situashon geo-polítiko entre Rusia i Ukrania a kondusí na skarsedat di produkto na skala mundial, loke a yega na kousa un inflashon haltu. Pa Kòrsou por fasilitá kresementu ekonómiko strukturá i duradero, Minister di Desaroyo Ekonómiko huntu ku su ministerio a prepará un plan di rekuperashon ekonómiko pa Kòrsou. E plan akí ta basá riba tres área.

1. Reforma ekonómiko struktural dirigí riba refuerso di nos fundeshi ekonómiko.
2. Desaroyo i atrakshon di invershon den e sektor di Turismo, komo katalisadó di nos kresementu ekonómiko riba término kòrtiku.
3. Desaroyo i invershon den e sektor industrial ku enfoke riba implementashon di un strategia dirigí riba eksportashon.

Pa loke ta e área di reforma (1),  lo konsentrá riba entre otro kosto pa hasi negoshi, ku e intenshon pa hasi Kòrsou mas atraktivo i kompetitivo, loke mester resultá tambe den mihó preis pa konsumidó. Banda di esaki, eliminashon di burokrasia ta parti di e reforma pa asina por atraé mas invershon internashonal pero tambe stimulá invershon lokal. Pa loke ta e sektor di turismo (2), lo intensivá promoshon di Kòrsou den eksterior, ku énfasis  pa atraé invershon. Lo traha riba diversifikashon di e sektor pa medio di desaroyo di e sektornan di entre otro turismo médiko i turismo di medioambiente. Pa loke ta e sektor industrial (3) ku enfoke riba eksportashon …, atenshon lo ta entre otro riba transishon energétiko kaminda lo eksplorá e posibilidat pa almasená energia duradero i eksportá  esaki komo fuente di entrada. Lo stimulá entre otro, sektornan manera IT, servisio finansiero internashonal, i refineria.

Pe realisá invershon ku ta “boost” ekonomia, mester di fondo di garantia ku lo sirbi komo katalisadó pa un kresementu na término kòrtiku.

Ministerio di Finansa

Durante e krísis di Corona, entradanan di impuesto a baha konsiderablemente; esaki a kousa ku nos kuota di debe nashonal a subi te na un nivel demasiado mas haltu di loke den paisnan karibense ta konsiderá aseptabel. Pa por mantené nos finansa públiko manehabel, mester hasi e reformanan nesesario. Nos dushi Kòrsou ta pasando den un temporada desafiante pero ku forsa di boluntat, den union i ku perseveransia nos lo sali pa dilanti.

Prioridatnan di Ministerio di Finansa pa e aña parlamentario akí ta inkluí modernisashon di nos servisio di impuesto pa medio di reorganisashon i mihó sinkronisashon entre ‘Inspectie der Belastingen’ i ‘Ontvanger’. Un ‘helpdesk’ lo kontribuí na un mihó servisio pa komunidat. Pa por aliviá trabou di e ámtenarnan ku aktualmente ta traha den nos servisio di impuesto, Ministerio di Finansa lo pone e debido atenshon na e vakaturanan krusial ku mester yena na ‘Inspectie der Belastingen’, ‘Ontvanger’, Duana i Ministerio di Finansa.

Un di e metanan prinsipal di Ministerio di Finansa ta pa drecha finansa públiko. Lo hasi esaki mediante implementashon di e asina yamá ‘Roadmap Financieel Beheer’, di moda ku Kòrsou lo yega na haña un deklarashon di aprobashon (“goedkeurende controleverklaring”) pa tur su relatonan anual finansiero ku ainda ta pendiente.

Den kuadro di nos finansa públiko, ta nesesario pa Ministerio di Finansa, brinda su apoyo i sosten pa implementá e reformanan nesesario konforme palabrashon hasí den e Landspakket di Kòrsou. Esaki ta konta tambe pa e reformanan ku ainda no ta inkluí den e Landspakket pero ku lo ta di benefisio pa nos finansa públiko.

Den e aña parlamentario akí, konforme palabrashon ku Hulanda, gobièrnu no por tin défisit riba ‘gewone dienst’. Ta p’esei, Ministerio di Finansa, den kolaborashon ku otro ministerionan, lo hasi nan máksimo esfuerso pa kontrolá gastu, spesialmente gastunan di salubridat, di moda ku por usa e entrada di impuesto pa hasi invershon na benefisio di nos pueblo.

E aña parlamentario akí Ministerio di Salubridat, Medioambiente i Naturalesa tin su  bista fiho riba reformanan den área di salubridat, pa por garantisá kontinuidat di kuido pa nos tur. Durante ku ta hasi e reformanan, tur área di salú lo haña e atenshon nesesario.

Ministerio di Salubridat, Medioambiente i Naturalesa lo duna atenshon i hasi esfuerso konkreto pa logra un Kòrsou ku un higiena ambiental optimal, entre otro poniendo atenshon tambe na limpiesa di nos laman ku ta un responsabilidat kompartí entre gobièrnu i kada siudadano.  Esaki ta reflehá den e echo ku por sierto a proklamá aña 2022 komo Aña di Limpiesa.

Un medioambiente limpi lo influensiá nos kalidat di bida i nos salú positivamente.  Gobièrnu ta kontribuí na esaki dor di desaroyá i apliká norma pa kalidat di airu. Lo usa diferente medio pa alsa konosementu di nos poblashon, i duna balor na nos bunita naturalesa.

Na kambio di klima tambe lo bai dediká mas atenshon,  mirando ku ta un fenómeno ku mundialmente tin su impakto i su efekto riba diferente aspekto di bida. Ministerio di Salubridat, Medioambiente i Naturalesa lo enfoká riba konsekuensia di e impakto akí i su efekto riba salú di hende, medioambiente, naturalesa, i riba produkshon di kuminda mediante agrikultura, krio di bestia i piskamentu. Ku e meta pa traha i ehekutá maneho ku ta minimalisá riesgo di skarsedat di produkshon di kuminda lokal, pero ku ta brinda posibilidat inovativo pa protehá salú, medioambiente i naturalesa, lo hasi uso di metodologianan ku ta garantisá durabilidat.

Krísisnan aktual rònt mundu ta pone nos reflekshoná atrobe kon importante ta pa dediká tur nos esfuerso pa keda salú i prevení mas tantu posibel tur tipo di enfermedat. Hopi importante tambe ta pa nos prevení daño na nos medioambiente i nos naturalesa.

Señora Presidente,

E maneho di Ministerio di Hustisia lo ta pa promové kolaborashon lokal i internashonal, i tambe optimalisá servisio na públiko. Ta di mashá importansia tambe pa aplikashon di lei i mantenshon di órden públiko tuma lugá di un manera apropiá. Pa por logra esaki lo optimalisá i reforsá tambe e organisashonnan enkargá ku ‘ehekushon’. Lo trata hóbennan i personanan ku kai den man di hustisia di un manera holístiko, pues lo no enfoká solamente riba e parti represivo, pero e enfoke lo ta tambe riba e parti preventivo i di resosialisashon.

Riba tur kos, fortifikashon di nos fronteranan tin prioridat e aña parlamentario akí. Esaki,  ku meta pa evitá importashon di produktonan ilegal manera arma di kandela i droga. Gobièrnu lo fortifiká nos fronteranan tambe, pa evitá tráfiko di hende.

Den e sentido mas amplio di palabra, e gabinete akí tin seguridat di nos pueblo na pechu.  Aporte na seguridat general ta un responsabilidat di pueblo kompleto i di tur ministerio ku tin influensia riba seguridat.

E meta ta pa alsa e sentido di seguridat general den poblashon di Kòrsou. E aspirashon akí ta alkansabel si tur “stakeholders” relevante duna di nan parti. Ku e aporte di nos tur, nos lo no sinti nos solamente mas sigur, sino nos lo ta efektivamente mas ‘seif’ tambe.

Di e manera akí, nos ta krese huntu i yega na un situashon kaminda e órganonan outorisá, di un forma kolektivo, ta krea e fasilidat- i medidanan nesesario pa rekonosé, mitigá, evitá i kombatí eventual menasa di atake riba nos siguridat.

Di un banda esaki ta brinda protekshon adekuá na pueblo di Kòrsou i di un otro banda e ta duna espasio pa por traha na desaroyo duradero di bienestar di nos pueblo i na e imágen di Kòrsou. Ministerio di Hustisia lo tuma un posishon di liderazgo pa medio di un kolaborashon intensivo ku otro ministerionan relevante, pa por alkansá su meta.

Señora Presidente,

Enseñansa ta toka kada un di nos komo yu di e tera akí. Pa nos komo hende, esta komo bon yu di Kòrsou patriótiko, desaroyo i enseñansa ta di sumo importansia. Ta p’esei Ministerio di Enseñansa, Siensia, Kultura i Deporte ta boga pa nos tin un bon enseñansa ku ta kontribuí na desaroyo i progreso di nos nashon Kòrsou. E meta di gobièrnu ta pa Kòrsou haña un sistema di enseñansa ku berdaderamente ta sirbi desaroyo i progreso di kada yu di Kòrsou.

Aña eskolar 2022-2023 lo ta un aña partikular, ya ku e ta marka komienso di e programa “Operashon pa Mehorashon di Enseñansa na Kòrsou”.

E maneho pa aña eskolar 2022-2023 ta un maneho di pueblo, pa pueblo i huntu ku pueblo di Kòrsou pasobra awor ta pueblo su bùrt. Ta partikularmente un maneho pa nos yunan por haña un mihó enseñansa. Ta nifiká ku e maneho mester ta transparente  i mester ta basá riba envolvimentu di tur esnan ku sin ningun otro interes por kontribuí na mehorashon di nos enseñansa.

Bon enseñansa ta importante pa por realisá desaroyo spiritual, mental, físiko i kultural. Enseñansa mester krea un siudadano kulto, ku por funshoná den nos mundu global i ku ta dominá e abilidatnan di siglo 21. Gobièrnu ta determiná pa logra esaki basá riba e metanan stratégiko di nos gobernashon manera un kalidat di bida haltu, un enlase sosial, un gobernashon demokrátiko efisiente i efikas di hende ku ta goberná mas serka di pueblo.

Bou di liderazgo di inspekshon di enseñansa i den estrecho kooperashon ku inspekshon di enseñansa di Hulanda i ku kooperashon tambe di “stakeholders”, Ministerio di Enseñansa, Siensia, Kultura i Deporte  a publiká un informe provishonal, un ‘Nulmeting’ pa investigá kiko ta loke mester mehorá den nos enseñansa.

Komo parti di e maneho, gobièrnu lo efektuá diferente medida pa optimalisá nos enseñansa, dirigí riba e alumno i e trahadó den enseñansa. Lo efektuá tambe diferente medida pa fasilitá e proseso di enseñansa i asina kontribuí na optimalisá funshonamentu na nos skolnan.

Señora Presidente,

Ministerio di Desaroyo Sosial, Labor i Bienestar

Ministerio di Desaroyo Sosial, Labor i Bienestar ta tuma e timon pa, huntu ku tur siudadano, kompania i instituto, stimulá desaroyo sosial i bienestar di abitantenan di Kòrsou, rumbo pa un ambiente duradero, saludabel, amoroso, sigur, konstruktivo, bibabel, ku insentivo di  trabou, estudio i bida, bou di kondishonnan emansipá. Famia i Hubentut, Labor i Desaroyo Sosial tin nan lugá sentral den esaki.

E metanan ku Ministerio di Desaroyo Sosial, Labor i Bienestar ta boga p’e, ta inkluí stimulá partisipashon, enlase sosial i un kultura di mediashon den bario i distritonan di nos pais. Lo empoderá abitantenan di Kòrsou entre otro mediante akseso na retnan sosial. Tambe ta di mashá importansia ku ta stimulá desaroyo sano di mucha i reforsá funshon di famia. Lo brinda kuido integral na famianan, na hubentut i na gruponan vulnerabel den nos sosiedat.

Komo gobièrnu, nos lo brinda protekshon di derechonan di famia i hubentut i di gruponan vulnerabel. Bou di esaki ta kai e deklarashonnan universal di derecho humano pa protekshon i estímulo di derechonan humano di personanan di edat avansá, Deklarashon di Derechonan di personanan ku desabilidat, Tratado di derechonan ekonómiko, sosial i kultural i Tratado di derechonan di mucha.

Den kuadro di reforsá demanda i oferta riba merkado di labor, Gobièrnu lo reevaluá introdukshon di skol di fishi, pa asina brinda oportunidat spesialmente na nos hóbennan pa nan haña e preparashon nesesario pa por integrá ku mayor fasilidat den e merkado di labor, pa asina nan por bira mas resiliente i tuma rienda di nan propio destino.

Ademas di esei, lo stimulá akseso na merkado laboral, bon relashon laboral, un seguridat sosial balansá i hustisia sosial. Lo tin e debido interes pa Kòrsou riba tereno di maneho di desaroyo sosial, di famia i hubentut i di labor den lasonan di reino, tantu regional komo internashonal.

Ministerio di Transporte, Tráfiko i Planifikashon Urbano ta responsabel pa desaroyo duradero di tráfiko, transporte i planifikashon urbano. Den e ministerio akí e palabranan integral, sigur i limpi ta sentral. E ministerio ta un organisashon kaminda ta hasi uso di e mihó instrumentonan pa mantené i mehorá kalidat di bida di tur siudadano i pèrkurá pa aksesibilidat optimal di Kòrsou.

Despues di algun aña di hopi reto finansiero, tékniko i organisatorio, ku a kondusí entre otro na e echo ku invershonnan den nos infrastruktura a stanka, pero tambe ku tabatin tardansa den otorgamentu di e pèrmitnan nesesario i terenonan pa proyekto ekonómiko, Ministerio di Transporte, Tráfiko i Planifikashon Urbano tin su bista fiho riba kambio pa mihó den e aña benidero.

E ministerio aki ta sumamente orguyoso ku un di e proyektonan den kuadro di Landspakket, esta e kambionan na Domeinbeheer, ta resultando sumamente positivo. Diferente di e ideanan di e grupo di trabou ta loke nos ta yama ‘game changers’. Huntu ku entre otro Ministerio di Finansa lo bini kambio fundamental pa oumentá nos entrada nashonal i tambe un forma muchu mas strukturá i efikas den e proseso di fasilitá uso di tereno i edifisio den nos desaroyo sosial-ekonómiko.

Pa loke ta nos infrastruktura, tin intenshon di atendé e asuntu akí di un manera ambisioso, i p’esei a traha un plan di mas aña pa mantenshon di nos ret di karetera. Un plan ku pronto lo keda entregá.

Infrastruktura ta konsistí di muchu mas ku djis konstrukshon i mantenshon di kaya. E área kantu di kaminda, roi, plenchi i lus di kaya tambe ta kai bou di infrastruktura i ta parti di e responsabilidatnan di e ministerio akí.

E aña aki Willemstad, nos patrimonio mundial, ta kumpli 25 aña riba e lista di UNESCO. E vibrashon positivo aki ta wòrdu rekonosé no solamente na Kòrsou òf den Reino, sino rònt mundu tambe. Ministerio di Transporte, Tráfiko i Planifikashon Urbano ta traha huntu ku invershonista grandi manera APC (Algemeen  Pensioenfonds van Curaçao) pa sigui desaroyá i kuida nos sentro di siudat.

Riba tereno aéreo, marítimo, di bibienda i di seguridat den tráfiko, tin hopi trabou pa e ministerio akí realisá. Un di e metanan prinsipal ta, pa resolvé e problemanan aéreo i marítimo. Diferente trayekto entablá ta sigui, pa pèrkurá ku e supervishon di tráfiko aéreo i marítimo ta sigui kumpli ku e normanan internashonal. Ministerio di Transporte, Tráfiko i Planifikashon Urbano ke duna aporte visibel tambe pa medio di mihó infrastruktura, transporte públiko, desaroyo di tereno i maneho teritorial pa asina krea un Kòrsou sostenibel, bibabel i próspero.

Mishon di Ministerio di Transporte, Tráfiko i Planifikashon Urbano ta …, trata spesífikamente na mantené konekshonnan nashonal i internashonal konfiabel, protehá nos komunidat kontra kondishon di klima peligroso, pèrkurá pa desaroyo duradero pa loke ta uso optimal di espasio na Kòrsou i regla esakinan mediante infrastruktura i bibienda adekuá. Tambe lo traha lei i reglamento, anto pèrkurá pa ehekushon i supervishon di esakinan.

Señora Presidente, honorabel miembronan di Parlamento,

E aña parlamentario akí, meskos ku tur aña anterior lo tin su retonan ku kada minister lo mester enfrentá huntu ku e empleadonan di su ministerio. Pero sin reto, no tin éksito! Ta p’esei gobièrnu, den e aña parlamentario akí lo enfrentá kada reto poniendo pueblo di Kòrsou na primerísimo lugá, ku e meta fiho pa sali eksitoso for di kada reto. Eksitoso den e kuadro akí ta enserá ku e resultado lo ta na benefisio di pueblo di Kòrsou. Kada minister lo traha di forma transparente pa komunidat. Den tur sentido di palabra e transparensia akí lo hiba nos pueblo na gosa di un mihó kalidat di bida.

Ku kada desishon ku tuma, lo tene kuenta ku e efekto ku esaki por tin riba pueblo di Kòrsou en general. Gabinete Pisas II lo hiba un gobernashon di pueblo, pa pueblo i huntu ku pueblo di Kòrsou, pasobra … ta pueblo su bùrt”.

Dios bendishoná nos Pueblo, Dios, Bendishona Kòrsou.