Publiká riba 03 Yanüari 2021
Willemstad – Durante fin di aña tabatin hopi hende rabiá pasombra nan a bai kumpra kos ku nan karchi sosial i no tabatin sèn riba esaki. Ministerio di SOAW ta lamentá esaki pasobra risibidónan di ònderstant a risibí rekargo riba nan karchi sosial riba e dianan 4 i 18 di desèmber 2020.
Apesar di esaki i pa kumpli ku e kantidat di petishon di risibidónan di ònderstant, Ministerio a logra i a komuniká esaki via medionan di prensa ku risibidónan di ònderstant lo risibí nan ònderstant dia 31 di desèmber i esaki a tuma lugá manera a komuniká. Esaki ta pa por a hasi posibel pa e risibidónan di ònderstant por kumpra algun kos netamente den e dianan di fin di aña a hasi lo máksimo pa logra ku nan por a risibí nan ònderstant dia 31 di desèmber.
Klaro ku nos ta lamentá ku vários hende no a skucha òf lesa bon i a bai kumpra kos keriendo ku tin sèn riba e karchi sosial.
Segun skema, risibidónan di ònderstant lo a risibí nan ònderstant riba 4 di yanüari 2021 i nan karchi sosial lo a ser rekargá dia 8 di yanüari 2021.
Pues no ta bèrdat ku a engañá risibidónan di ònderstant, al kontrali, a hasi lo máksimo pa nan por a risibí nan ònderstant promé ku fin di aña.
Entrante yanüari lo saka e skema ku e fechanan ku risibidónan di ònderstant ta risibí nan ònderstant i tambe lo informá e dianan ku e karchinan sosial pa kumpra komestibel lo ser rekargá. Esakinan lo keda kompartí ku risibidónan di ònderstant regularmente.
