Publiká riba 23 Mart 2023
Willemstad – E kompania Deli-Nova ta siguí ku su proyekto di ekspanshon den e edifisio kaminda ántes tabata Kuster Trading den Zeelandia. Minister Charles Cooper huntu ku Servisio pa Planifikashon Urbano (ROP) a hasi entrega di un pèrmit pa ekspanshon, i rekonstrukshon di Deli-Nova su depósito riba Kaminda Andre J. Kusters.
Deli-Nova ta un kompania ku ya pa 30 aña ta brinda servisio na e sektor di HORECA aki na Kòrsou. Durante di e periodo di COVID, hopi suidadano por a hasi uso di Deli-Nova su servisionan pa kompra di produktonan.
Minister Cooper ta kontentu ku e kompania lokal aki ta hasi un invershon grandi den ekonomia di e pais aki na un balor di 12.8 mion florin.
Tambe, Deli-Nova awor ta finalisando e delaster fase kual ta konstrukshon di un “drive thru”.
Minister Cooper ta felisitá Deli-Nova i ta deseá nan éksito ku e proyekto aki.