Publiká riba 09 Yüli 2020
WILLEMSTAD – Dia promé di yüli a habri frontera pa turistanan prosedente di paisnan ku ménos riesgo pa transmishon di COVID-19. Gobièrnu di Kòrsou i e tim di krísis a tuma e desishon aki despues di análisis profundo i konseho di ekspertonan. Esaki por ehèmpel ta konta pa Hulanda, kaminda a base di data por a konkluí ku e chèns ta relativamente chikitu ku personanan di e pais aki por plama e vírùs riba nos isla. Por lo pronto lo mantené frontera será si pa paisnan manera Merka, Colombia i Repúblika Dominikana, ku ainda no a logra dominá transmishon lokal di COVID-19.
A habri frontera pa turismo di Hulanda ku tur koutela i preparashon nesesario. A sòru ku Kòrsou ta hopi mas mihó prepará pa posibel kasonan, a informá e sektor di turismo debidamente, a tuma medidanan di prekoushon i a duna instrukshonnan na komunidat pa redusí posibel riesgo mas tantu posibel. Banda di esei, na Hulanda ta tèst tur pasahero ku ta biaha pa Kòrsou. Alabes, tur pasahero mester kumpra un seguro di biahe ku lo kubri posibel gastunan den kaso ku tòg resultá ku un persona bira malu. Te na e momentunan aki Kòrsou a risibí mas ku 2000 pasahero liber di COVID-19 for di Hulanda.
Por mira ku mas i mas pais ta habri nan frontera kual ta algu lógiko, pasobra e vírùs di corona lo no disparsé i niun pais no por keda ku frontera será pa tempu indefiní. Importante ta pa nos asumí nos responsabilidat i keda mantené reglanan di higiena:
– Bo sinti bo kurpa malu, keda kas i tuma kontakto ku bo dòkter di kas;
– Laba man ku habon òf “hand sanitizer” frekuentemente;
– Tosa òf nister den èlebog;
– Evitá sitionan kaminda distansha sosial ta difísil pa mantené.
