Publiká riba 17 Ougùstùs 2021
WILLEMSTAD – Gobièrnu di Kòrsou a skohe pa riba 17 di ougùstùs 2021 firma un Deklarashon di Intenshon (Letter of Intent) ku Fundashon Museo Tula. Den e Deklarashon di Intenshon akí partidonan a komprometé pa uni forsa i konosementu den remodelashon i eksplotashon di Museo Tula situá den lanthùis Kenepa komo un produkto kultural, edukativo i turístiko. A skohe spesífikamente e fecha akí, mirando ku esaki ta e fecha riba kua nos héroe nashonal Tula a inisiá e lucha pa emansipashon di libertat, igualdat i fraternidat na 1795 saliendo for di plantashi Kenepa.
Meta di e Deklarashon di Intenshon akí, ta pa remodelá Museo Tula pa e bira un instituto públiko permanente ku ta sirbi komo memoria di komunidat di Kòrsou i en partikular komo fuente di inspirashon pa desaroyo emansipatorio di Kòrsou. Alabes, el lo fungi komo un sentro edukativo i un atrakshon turístiko. Mirando ku e remodelashon di Museo Tula ta konektá tantu e maneho kultural edukativo komo e maneho ekonómiko turístiko di Kòrsou, Konseho di Minister a outorisá direktor di sektor di Kultura i Deporte di Ministerio di Enseñansa, Siensia, Kultura i Deporte (OWCS) sra. Lizette Sambo-Velder i direktor di sektor di Desaroyo Ekonómiko i Inovashon di Ministerio di Desaroyo Ekonómiko (MEO) sra Zulaika Mook, pa firma e Deklarashon di Intenshon huntu ku Fundashon Museo Tula. Debí na ousensia di sra. Sambo-Velder, esaki a keda remplasá pa sra. Susan Larmonie-van Heydoorn kende ta Direktor di Maneho di Ministerio di OWCS durante firmamentu di e Deklarashon.
E palabrashonnan entre MEO, Ministerio di OWCS i Fundashon Museo Tula ya a bin ta tuma lugá pa un tempu kaba, pero debí na e pandemia i algun otro kontratempu no a logra firma e deklarashon akí mas promé. Sinembargo, MEO ya a kuminsá duna su aporte na Fundashon Museo Tula pa medio di e programa di coaching grátis ku ta keda ofresé pa MiNegoshi. Pa medio di MiNegoshi, e fundashon ya por yega na formulá su plan di negoshi, desaroyá su plan finansiero i tambe traha riba un plan di merkadeo pa e konsepto nobo i duradero di Museo Tula.
Den e trayekto a skohe konsientemente pa uni forsa ku Fundashon Museo Tula mirando ku e fundashon su base ta formá netamente dor di abitantenan di Kenepa, Wespen i Lagun pero tambe pa motibu di e eksperensia riku di Fundashon Museo Tula den lantamentu, desaroyo i eksplotashon di Museo Tula na 2007 i despues ku lantamentu i eksplotashon di Museo Kas di Pal’i Maishi na Dokterstuin. Un eksperensia riku ku asta a keda rekonosé i akreditá internashonalmente na novèmber 2019 dor di UNESCO pa trabounan den stimulashon i protekshon di herensia intangibel.
Ku hopi satisfakshon, Gobièrnu di Kòrsou i Fundashon Museo Tula ta uni forsa pasó esaki ta habri posibilidat di konbertí eksplotashon di Museo Tula, huntu ku eksplotashon di Museo Kas di Pal’i Maishi i tambe Museo Kas di Vito Valks, den un triángulo di museonan ku por sirbi komo un pèrla di emansipashon di Kòrsou.
