Publiká riba 26 Novèmber 2021
Willemstad- Ministerio di Desaroyo Ekonómiko (MEO) ta kontentu di por anunsiá, ku riba 15 sèptèmber último Konseho di Minister a bai di akuerdo pa ofisialisá un Komishon Konsultivo (Adviescommissie) pa trata ku pèrmitnan di HORECA ku e ministerio ta risibí. E komishon akí no solamente lo bai duna konseho strukturalmente riba petishonnan pendiente pa pèrmitnan di HORECA, pero tambe lo bai atendé ku opheshon ku drenta despues ku e anunsio di e pèrmit, konforme lei, sali den korant. Ofisialisashon di e Komishon Konsultivo akí, lo pèrkurá pa di awor en adelante e prosedura di pèrmitnan di HORECA, e.o. restorant, hotèl i alohamentu por kana na un manera muchu mas efisiente, di akuerdo ku e términonan legal i denter di e kuadronan di nos Ordenansa Nashonal di Pèrmit (Vergunningslandverordening).
Segun e Ordenansa Nashonal di Pèrmit, MEO ta esun ku ta karga e responsabilidat pa evaluá, trata i finalisá kada petishon ku drenta pa un pèrmit di HORECA. Di akuerdo ku lei, MEO mester risibí konseho positivo serka 4 otro instansia gubernamental promé ku por otorgá e pèrmit di HORECA na un persona òf instansia; esakinan ta Unit Bijzondere Wetten Korps Politie Curaçao (UBW/KPC), Departamento di G&Gz ku ta kai bou di e Ministerio di Salubridat Públiko, Medio Ambiente i Naturalesa (GMN), Servisio pa Planifikashon Urbano (ROP) ku ta kai bou di e Ministerio di Tráfiko, Transporte i Planifikashon Urbano (VVRP) i Brandweer Curaçao.
E Komishon Konsultivo lo konsistí di empleadonan di e departamento di Pèrmit Ekonómiko di MEO, Brandweer, UBW/KPC, G&Gz i tambe ROP.
E komishon lo bishitá e diferente lokalidatnan ku tin un petishon pendiente pa un pèrmit di HORECA i hasi nan opservashon di e sitio. Despues ku MEO risibi di kada instansia nan konseho por eskrito, por finalisá e petishonnan en kuestion. E komishon tin komo meta pa aselerá e prosedura di otorgamentu di permit. Komo ‘Front-Office’ den e proseso di pèrmitnan ekonómiko, Lokèt di Pèrmit lo tuma kontakto e ora ei ku e persona òf instansia pa por atendé entrega di e pèrmit òf pa avisá si akaso ku e petishon a risibí konseho negativo.
Ministerio di Desaroyo Ekonómiko ta sumamente kontentu ku e paso akí pa atendé ku pèrmitnan di HORECA di awor en adelante. Entrega di pèrmitnan di HORECA ta nifiká entradanan real na gastunan di leges pa e kaha di Gobièrnu i ta yuda pa baha e gastunan di hasi negoshi na Kòrsou.
