Publiká riba 01 Mei 2021
Willemstad – Tim di Bakunashon ta drenta barionan di Kòrsou ku e proyekto piloto: “Bakuna Den Bario”. Entrante djadumingu awor 2 di mei, e Tim di Bakunashon ta drenta algun bario riba dianan spesífiko pa asina fasilitá habitantenan e posibilidat pa hasi pregunta i tambe bakuná den nan mes bario na e sentro mobil den bario. Esaki ta posibel entre 9’or di mainta nòn stòp te ku 4’or di atardi.
Tim di Bakunashon, enkabesá pa Epidemiólogo Irálice Jansen, a bin ta traha inkansabel último simannan riba e trayekto di bakunashon di komunidat di Kòrsou. A kuminsá e trayekto ku hendenan di 60+ i gruponan di riesgo, pa despues amplia e kapasidat pa komunidat kompleto bakuna. Den e trayekto anterior a eskalá sentronan di bakunashon pa asina por akapará tur ku kier òf por a bai bakuná. Mirando ku tin un grupo grandi di nos komunidat ku no tin e medionan pa yega na un di e sentronan di bakunashon, awor a krea e posibilidat pa bai den barionan di Kòrsou.
Bibando Den Bario
Bibando Den Bario ta hiba kombersashon ku miembronan di komunidat ku no ta asina konektá ku medionan digital, ku e grupo ku kisas ainda tin pregunta òf duda i alabes pa fasilitá e gruponan den nos komunidat ku no por yega e sentronan di bakunashon mas grandi. E trayekto di bakunashon den bario ta den kolaborashon ku representante i lidernan di bario, pa por yega mas serka di e habitantenan ku kisas ainda no tin e informashon òf medio pa yega na informashon nesesario.
Den kolaborashon ku LABdeMED i ADC ta bai ku algun unidat mobil den e barionan. E unidatnan mobil ta ekipá ku tur rekesito i seguridat di un Sentro di Bakunashon i tambe tin asistensha médiko i di opservashon. Adishonalmente ta bai ofresé transporte grátis den bario, den koperashon ku ABC Busbedrijf. Den kada bario ku bishitá, ta bai tin bùsnan ta kore den e barionan i besindario pa buska i hiba habitantenan ku ke bishitá e sentro mobil di bakunashon.
Orario di bakunashon den bario ta di 9’or di mainta pa 4’or di atardi, pa tur habitante i tambe personanan indokumentá. E barionan ku lo bishitá den e promé ronda di Bibando Den Bario ta:
Djadumingu, 2 di mei: Misa di Steenrijk
Djaluna, 3 di mei: Misa di Steenrijk i Misa di Soto
Djamars, 4 di mei: Sentro di Bario Bonam i Misa di Tera Kora
Djárason, 5 di mei: Sentro di Bario Bonam i Misa di Tera Kora
Tim di Bakunashon ta invitá habitantenan di Steenrijk, Soto/Sta. Martha, Bonam, Tera Kora i tur bario den besindario pa pasa libramente. Sea na pia, ku outo òf ku e transporte grátis, pa asina hasi tur pregunta tokante bakuna i bakuná si esaki ta bo deseo.
Tur e rutanan di transporte grátis di kada bario, ta optenibel tambe riba kanalnan ofisial di Gobièrnu di Kòrsou.
Klek aki pa download e rutanan di bùs pa kada bario den formato PDF, òf scroll bai abou.
