Publiká riba 11 Desèmber 2019
Pa loke ta trata e diskushon rondó di ‘Nullijn’ i ‘Vervroegde Vrijwillige Uitstroom’
Gobièrnu a informá Staten, empleadonan públiko i sindikatonan debidamente
Willemstad – Gobièrnu ta konsiente di e echo ku meskos ku ta e kaso ku den komunidat, den seno di e aparato públiko tambe e preshon pa ahustá bida na konsekuensianan di e mal prestashon di nos ekonomia ta hasi doló. E mal estar ekonómiko ta pone ku Gobièrnu ta risibí supstansialmente ménos entrada na impuesto kompará ku añanan promé. Esaki ta pone Gobièrnu dilanti di e reto di baha su gastunan na nivel di loke e ta risibí na impuesto i na mes momentu keda brinda pueblo por lo ménos e mesun nivel di servisio. Esaki ta buta tambe riba Gobièrnu e deber i obligashon pa splika tantu ku ta posibel ta kua ta e pasonan ku Gobièrnu ta entamá den e kuadro aki. Loke Gobièrnu a i ta kumpliendo kuné.
Gobièrnu a hasi tur esfuerso pa informá e empleado públiko na plaka chikí.
Gobièrnu ta kompletamente transparente ku pueblo i ku empleadonan públiko. Pa loke ta empleadonan públiko ta asina ku Gobièrnu a tene mas ku 50 seshon di informashon kaminda tur ámtenar ku a deseá esei por a akudí. E seshonnan aki a tuma lugá tantu ku ta posibel na boka di trabou di e ámtenar. Durante di e seshonnan aki a duna splikashon di finansa públiko i a splika tambe ta kua ta e pasonan ku Gobièrnu tin intenshon di tuma pa alsa motivashon i produktividat den aparato públiko.
Kada minister a splika ámtenarnan di su ministerio tokante ‘Aanwijzing’ i ‘Groeiakkoord’
E echo di e ‘Aanwijzing’ i firmamentu di e ‘Groeiakkoord’ tabata motibu pa Gobièrnu sigui informá e empleado públiko. Kada minister a tene seshonnan di informashon pa e diferente partinan di nan ministerio. Tur empleado públiko ku a deseá por tabata presente na e seshonnan. Den e seshonnan ei a splika e kon i di kon di e ‘Aanwijzing’ i ‘Groeiakkoord’, anto a para ketu detayadamente na e aspektonan ku ta toka e ámtenar. Konkretamente a duna splikashon i kontestá preguntanan tokante e.o. ‘Nullijn’ i ‘Vervroegde Vrijwillige Uitstroom’ (VVU).
Gobièrnu tabata transparente ku Parlamento tambe.
Tambe ku Parlamento Gobièrnu a praktiká transparensia. Gobièrnu, asina ku e rapòrt di “Commissie Doorlichting Begroting’ tabata kla, a aserká Parlamento i durante di un Reunion Públiko a splika e konklushonnan i rekomendashonnan bou di kua ‘Nullijn’ i ‘VVU’. Tambe Parlamento a risibí kopia di e rapòrt. Otro momentu riba kua Parlamento a risibí informashon tokante ‘Nullijn’ i ‘VVU’ tabata na entrega di e ‘Groeiakkoord’. Parlamento te hasta a hiba debate riba e ‘Groeiakkoord’ i a konkluí ku un moshon dunando Gobièrnu sosten pa ku implementashon di e ‘Groeiakkoord’. Ademas ta asina ku
den ‘Nota van Financiën’ (página 47) i den e ‘Algemene Beschouwing‘(página 19) pa ku presupuesto di 2020 ku Parlamento a aprobá resientemente, ta para ketu na e aspekto di ‘Nullijn’ i ‘VVU’.
Ta straño ku sindikatonan ta bisa di no sa nada di VVU
Minister di BPD, riba 30 di ougùstùs 2019, a risibí direktiva di ABVO i direktiva di SITEK na su despacho. Durante di e enkuentro aki a duna na e dirigentenan sindikal tur informashon tokante ‘VVU’. Seshonnan similar a tuma lugá riba dos di sèptèmber último durante kua direktiva di respektivamente NAPB, StRAF i SAP tambe a risibí informashon. Tur 5 direktiva a duna di konosé di ta warda pa te na momentu ku Gobièrnu tin e proyekto di lei kla pa den reunion di CGOA diskutí un ke otro. E konseptonan di lei no ta kla ainda. Pa tal motibu nan no a keda ofresé na CGOA ainda.
Ta straño ku sindikatonan ta bisa di no sa nada di ‘Nullijn’
Riba 29 di òktober último, tantu minister presidente komo minister di BPD, den seshon ‘no formal’ a tene un presentashon tokante ‘Groeistrategie’, ‘Groeiakkoord’ i ‘Aanwijzing’. E enkuentro aki ku a tuma lugá bou di guia di Prof. Dr. Ing. Valdemar Marcha. Durante di e seshon aki a para ketu na ‘Nullijn’. E dirigentenan sindikal na e okashon ei a duna di konosé di ta tuma nota di e informashon ku Gobièrnu a duna, pero ta warda na momentu ku Gobièrnu ofresé e konsepto di lei en kuestion na CGOA pa hiba diskushon den seno di CGOA.
Gobièrnu pa medio di karta di fechá 15 di novèmber 2019 ta hasi entrega di konsepto di lei na CGOA ku e petishon pa por trat’é durante reunion di 24 di novèmber. ‘Nullijn’ tabata riba agènda. No a yega na trata e punto di agènda en kuestion ya ku sindikatonan a pidi pa posponé tratamentu di e punto.
Gobièrnu ta respetá diálogo i ta aktua konforme lei di CGOA
Sindikato ABVO, djabièrnè último, a tene seshon di informashon pa su miembronan. Gobièrnu a tuma nota di deklarashonnan ku presidente di ABVO a hasí na prensa. Gobièrnu di su banda ta enfatisá di a:
