Notisia

WILLEMSTAD – Djárason 15 di yüli 2020 Gobièrnu di Kòrsou a yega na un desishon enkuanto e medida di redukson di 12.5% riba pakete di kondishonnan laboral di tur empleado den sektor públiko, relashoná ku e kondishonnan di Gobièrnu di Reino mará na e sosten di likides.

E petishon di Gobièrnu di Kòrsou na Gobièrnu di Reino pa sosten di likides a lanta for di e nesesidat pa buska formanan pa yuda mitigá e konsekuensianan finansiero i sosial-ekonómiko di e pandemia di COVID-19. E medidanan ku mester a tuma obligatoriamente pa evitá ku e vírùs di Corona ta plama na Kòrsou, a kondusí na un paro kompleto di tur aktividat ekonómiko. Esaki tabatin komo konsekuensia ku Gobièrnu a pèrdè gran parti di su entrada ku nòrmalmente e ta risibí via belasten. Sin sosten di likides di Gobièrnu di Reino, lo bira den korto tempu imposibel pa kumpli ku entre otro:

• Pago di salario;
• Sosten finansiero na esnan ménos prudente den komunidat;
• Restrikshon di mas desempleo;
• Stimulashon di rekuperashon ekonómiko.

Redukshon di 12.5% riba e pakete di kondishonnan laboral total ta konta pa tur empleado di sektor (semi) públiko, inkluyendo tur kompania di Gobièrnu i tur fundashon ku ta supsidiá pa 50% òf mas dor di Gobièrnu. Esaki tur den kuadro di solidaridat na empleadonan pafó di sektor públiko.

Gobièrnu a opta pa e siguiente senario di redukshon:

• Ta fris trapi salarial;
• No ta paga 3% lumpsum;
• Plaka pa fakansi (vakantiegeld) ta baha ku 6%;
• Kantidat di dia di fakansi ta baha ku 3.5% – esaki ta nifiká un promedio di bahada di 6.5 ora di fakansi pa kada empleado.

Pa kumpli ku e kondishonnan, Gobièrnu a basa su mes riba e siguiente puntonan di salida:

1. No ta mishi ku salario básiko pa mantené forsa di kompra i perspektiva pa penshun sigui krese.
2. Trahadónan ku salario den e skalnan mas abou no ta inkluí den e redukshon, pa evitá ku nan ta resultá bou di nivel di salario mínimo (minimumloon).
3. E redukshonnan ta bira vigente entrante 1 di yüli 2020.

Konforme paragraf 1 di artíkulo 6 di “Landsverordening Georganiseerd Overleg in Ambtenarenzaken” (PB. 2008, no. 70), Gobièrnu di Kòrsou a ofresé dos senario na sentral sindikal. Un grupo di trabou, ku a inkluí representante di tur dos partido, a deliberá riba e dos senarionan. Riba 11 di yüni 2020 sentral sindikal a indiká di ta rechasá ambos senario ku Gobièrnu a presentá, ya ku nan no ta dispuesto na entregá riba e kondishonnan laboral. Na nan turno e representantenan di sentral sindikal a presentá un senario distinto na esnan ku Gobièrnu a proponé. Sinembargo, esaki no tabata kumpli ku e kondishon di redukshon di benefisionan laboral ku 12.5% stipulá pa Gobièrnu di Reino.

MAS NOTISIA

Ministerio konserní: Maneho di Gobernashon, Planifikashon i Servisio Públiko