Publiká riba 16 Yüni 2021
WILLEMSTAD- Den e periodo di 24 pa 30 di mei último, tur kompania ku ta bini na remarke por a hasi aplikashon riba sosten pa supsidio di salario (NOW) pa luna di mei 2021. Kompanianan ku a apliká den e periodo akí, ainda no a risibí e supsidio di mei 2021 pa motibu ku e luna akí SBAB ta hasiendo kontrolnan muchu mas intenso i kompletu di tantu aplikashonnan ku a drenta pa luna di mei komo tambe e lunanan anterior di 2021. SBAB ta terminando e proseso di kontrol akí i kompanianan por spera di kuminsá risibí pago di nan supsidio den e siman di 21 di yüni próksimo.
E kontrolnan mas intensivo di parti di SBAB, ta sirbi pa entre otro haña un bista di eventual montantenan ku e kompanianan por a risibí di mas na supsidio den lunanan anterior. Normalmente, SBAB lo mester a ehekutá e kontrol akí ku aplikashonnan pa kada luna. Den kaso ku keda determiná ku un kompania a risibí supsidio di mas, esaki lo a keda deskontá for di e supsidio ku e kompania lo mester a risibí pa e siguiente luna.
Debí na e situashon ku hopi kompania tabata konfrontá durante luna di yanüari te ku aprel 2021, e parti di kontrol akí a keda fleksibilisá mas tantu posibel pa asina logra ku e kompanianan por a risibí pago di nan supsidio delantá òf mas trempan posibel. E echo ku a prosesá e pagonan mas lihé i a suavisá e kontrolnan nesesario dor di SBAB, ta nifiká tambe ku posibel montantenan ku a keda pagá di mas a akumulá komo debe ku e kompania enkuestion lo mester paga bèk òf ku ainda mester keda dedusí for di e supsidio pendiente. Dor di ehekutá e kontrol na e momentunan akí, ta yuda evitá ku eventual montantenan di mas ta sigui akumulá i bira un debe astronómiko pa e kompania.
Un total di 546 aplikashon di NOW pa luna di mei 2021 ta finalisando e proseso akí, pendiente pa risibí nan pago den e siman benidero. Ministerio di Desaroyo Ekonómiko (MEO), SBAB i tambe SVB ta gradisí pa e indulgensia di parti di e kompanianan ku a apliká i ta ofresé diskulpa pa kualke inkumbiniensia ku e tardansa akí por a okashoná. No opstante esaki, nos ta konta ku kada kompania lo sabi di keda ehersé nan responsabilidat i kumpli ku nan empleadonan.
Pa loke ta trata e posibilidat di aplikashon pa supsidionan empresarial pa luna di yüni, MEO lo duna mas informashon asina ku tin klaridat si akaso pago di esaki ta bira posibel.