Notisia

WILLEMSTAD- Riba djamars promé di desèmber último, sr. Steven Croes a huramentá komo minister di Enseñansa, Siensia, Kultura i Deporte (ESKD). Mirando e importansia ku e ta duna pa tur esnan envolví den e sektor aki traha huntu, den su promé siman di trabou mesora minister Croes a sòru di sera konosí ku su tim di Maneho, representantenan di e diferente direktiva di skolnan, direktiva di sindikato Sitek i tambe el bishitá vários skol.

Minister Croes ta kere firmemente den e konsepto di “Teach them Young”. Den esaki, e minister ta enfatisá kon importante ta pa siña kada mucha fo’i tempran kiko ta norma i balor. Mester inkulká den nan e importansia di disiplina, e balor di kultura i mester siña nan partisipá aktivamente den nos komunidat i stima nan patria.  Minister Croes ta konvensí ku edukashon di norma i balor mester bira un prioridat den nos sistema di enseñansa. Enseñansa lo mester enfoká muchu mas riba kuríkulo di deporte, siensia, siña nos muchanan pa kome salú, instruí nan kon pa usa nan tablet òf kòmpiuter di forma responsabel, siña nan ki gran balor tin den nos kultura i siña mas idioma posibel.

Den su simannan inisial, e minister a duna prioridat na 10 punto di akshon kaminda huntu ku diferente eksperto ta bai hasi un inventarisashon/ investigashon amplio di tur problema den e área di enseñansa. Huntu ku e inventarisashon aki, lo presta atenshon tambe riba aspektonan di modernisashon i infrastruktura di edifisionan di skolnan i riba aspektonan di salubridat, higiena i seguridat pa dosente i alumnonan kua a bira aun mas importante meimei di e pandemia di Corona aki.  Temanan manera digitalisashon, skol integral (Whole School, Community, Child), konekshon entre enseñansa i merkado laboral, maksimalisashon di e kolaborashon i koperashon pa ku edukashon den sektor di kultura i mundu empresarial, mehorá maneho deportivo teniendo kuenta ku e infrastruktura pa yega na salú físiko, mental i sosial den henter e komunidat i tambe e maneho kultural pa e periodo di 2020-2025 ku ta enfoká riba kreatividat i konstrukshon di nos nashon (nation Building) ta puntonan di akshon ku sigur Minister Croes lo ke bai traha riba dje. Den e foyeto athunto por tuma nota di Minister Croes su Vishon pa su Ministerio: Vishon di Minister Croes

Minister Croes ya ta den kombersashon ku e diferente ekspertonan di e sektornan durante di e dianan aki, pa asina kuminsá ehekutá e temanan ariba menshoná. Ku e puntonan di akshon aki, basa riba e akuerdo di Gobernashon (2017-2021), ta duna kontenido na ehekushon konkreto ku bista i atenshon speshal pa enseñansa, formashon i kombatimentu di pobresa.

** riba e potrètnan athunto por tuma nota di kombersashonnan ku a tuma lugá entre Minister Croes i Ekspertonan di e sektor.