Publiká riba 17 Yüni 2020
WILLEMSTAD – Awe a habri e temporada ku nos, komo parti di Reino Hulandes, tin e oportunidat pa por nominá e kandidatonan ku nos ke honra pa medio di un kondekorashon real. Dia 14 di ougùstùs próksimo ta e último dia ku bo por entregá e formulario (voorstel formulier) yená ku informashon di bo nominado.
Tur aña riba dia Rei nos ta duna honor na personanan ku a duna aporte eksepshonal na nos komunidat. Riba e dia aki algun di e nominadonan ta risibí un Kondekorashon Real serka Gobernador di Kòrsou. E próksimo selebrashon di dia Real ta 27 di aprel 2021. E fecha aki ta mustra hopi leu, pero e prosedura ta tuma tempu. P’esei promé minister Rhuggenaath for di djárason 17 di yüni , durante e relato di dia di Gobièrnu di Kòrsou, a hasi un apelashon na pueblo di Kòrsou pa informá Komishon Kondekorashon Real ken lo por bini na remarke pa risibí un Kondekorashon Real otro aña. Durante e relato di dia aki señor Curd Evertsz (presidente Komishon Kondekorashon Real) a duna mas informashon tokante kon pa nominá un kandidato i e kaminda ku e nominashon aki mester kana.
Komishon Kondekorashon Real: Roland Colastica, Edgar Sintiago, Lucy Tielen, Eugene Rhuggenaath, Nicole Maduro, Curd Evertsz.
Ken ta bini na remarke pa keda kondekorá?
Un persona ku ta bini na remarke pa risibí un Kondekorashon ta un persona ku a kontribuí di forma eksepshonal na nos komunidat. E kontribushon por ta sea pa medio di su aporte boluntario na bienestar di nos hóben-, adulto- òf nos grandinan. Tambe un persona ku a kontribuí òf destaká di forma eksepshonal na deporte, enseñansa òf siensia na Kòrsou por bini na remarke pa risibí un Kondekorashon.
Kon abo por nominá bo kandidato?
Ku bo esfuerso bo por kontribuí pa un persona por risibí rekonosementu na nivel Reino Hulandes. Pa nominá bo kandidato bo mester buska, yena i entregá e ‘voorstel formulier’ pa hasi bo petishon. Huntu ku e ‘voorstel formulier’ tambe bo mester entregá algun dokumento importante. Banda di informashon di kontakto di e nominado, e petishonario mester entregá informashon tokante trabou, aktividatnan sekundario i méritonan speshal pa kual e persona ta keda nominá. Ta di gran importansia pa dos òf mas persona sostené e petishon aki ku un karta di motivashon. Tene kuenta ku e idioma den kual mester manda e informashon ta Hulandes.
E ‘voorstel formulier’ ta optenibel na Lokèt di Pèrmit (Saliña 127). Tambe por ‘download’ e ‘voorstel formulier‘ na www.gobiernu.cw. Despues ku yena e formulario mester deposité den un buzon na Lokèt di Pèrmit. Tambe ta posibel pa entregá e ‘voorstel formulier’, huntu ku tur e dokumentonan relevante, di forma digital via kondekorashonreal.cur@gmail.com. No lubidá ku dia 14 di ougùstùs awor ta e último dia ku por hasi esaki.
Kiko ta pasa despues?
Komishon di Kondekorashon ta evaluá i kontrolá tur informashon ku nan risibí. Despues di evaluá i kontrolá tur informashon e komishon ta entregá tur e dokumentunan konserní di nominadonan na Gobièrnu di Kòrsou pa trata esaki den Konseho di Minister. Seguidamente dokumentunan aki ta bai pa Gobernador, ku na su turno ta manda esakinan Hulanda pa evaluashon i aprobashon final. E trayekto aki ta tuma tempu, p’esei bo mester entregá informashon di bo nominado na tempu.
Bo tin pregunta òf ke mas informashon?
Si bo mester di yudansa pa yena e formulario òf si bo tin pregunta tokante Kondekorashon Real tuma kontakto ku Curd Evertsz òf un di e otro miembronan di e komishon (Lucy Tielen, Nicole Maduro, Edgar Sintiago i Roland Colastica)
Email: kondekorashonreal.cur@gmail.com
Telefòn: +599 9 510 0299
Tambe por buska mas informashon riba:
www.gobiernu.cw
www.lintjes.cw
Curd Evertsz (presidente Komishon Kondekorashon Real)
