Publiká riba 17 Sèptèmber 2020
WILLEMSTAD- Entrante djabièrnè 18 di sèptèmber, Ministerio di Desaroyo Ekonómiko (MEO) pa medio di MiNEGOSHI i konhuntamente ku Qredits i Korpodeko lo bolbe habri e portal pa brinda fasilidat di krédito na empresarionan mikro, chikí i mediano. Esaki tantu den sektor turístiko (horeca i sektor di transporte), pero tambe otro sektornan ku ta enkontrá difikultat finansiero komo konsekuensia di COVID-19.
E fasilidat di krédito aki tin komo meta pa di un forma inovativo yuda e empresario mikro, chikí òf mediano supli den e gastunan fiho di su empresa pa un periodo, i di e forma aki yuda e empresario stabilisá despues di COVID-19.
Pa por brinda un alivio na e empresario aki, MEO a uni forsa i kapasidat ku Korpodeko i Qredits. Den e proseso aki, tantu Korpodeko komo Qredits ta sigui traha independientemente for di Gobièrnu i kada un ta apliká nan propio proseso di krédito.
Pa por bini na remarke, e empresa entre otro mester ta establesé na Kòrsou i registrá na Kámara di Komersio promé ku 16 di òktober 2019 i e empresa mester pas den e definishon di Gobièrnu pa loke ta trata empresanan mikro, chikí i mediano. Un empresa mikro por tin entre un (1) pa kuater (4) empleado ku un ingreso di ménos ku 0,5 mion. Un empresa chikí tambe su ingreso mester ta ménos ku 0,5 mion, pero den e kaso aki e empresa por ta konsistí di entre sinku (5) pa dies (10) empleado. Un empresa mediano por tin entre diesun (11) pa sinkuenta (50) empleado ku un ingreso entre 0,5 te ku 5 mion. Pa por tuma nota di demas kondishon i rekisitunan pa por apliká pa e fasilidat di krédito aki, por bishitá www.fondodisosten.org.
E empresario ku ta bini na remarke ta risibí un fasilidat di krédito eksklusivo (un biaha so) serka Korpodeko òf Qredits ku kondishonnan di pago adaptá riba término largu (un periodo di grasia di máksimo 12 luna) i (temporalmente) un porsentahe di interes sumamente abou (2%). Si ta nesesario, e empresario lo risibí tambe guia i konseho pa asina sigurá ku e empresa por manehá e krédito debidamente i yuda reforsá e empresa su kapasidat pa na final kumpli tambe ku su deber di pago bèk.
E formulario pa hasi petishon pa e fasilidat di krédito aki lo ta habrí entrante djabièrnè 18 di sèptèmber pa 8’or di anochi riba fondodisosten.org i aplikashon lo ta posibel te ku djárason 30 di sèptèmber 8’or di anochi.
Si akaso tin kualke pregunta adishonal tokante e fasilidat di krédito aki, por tuma kontakto ku nos via kredito@fondodisosten.org
