Publiká riba 28 Aprel 2020
WILLEMSTAD — Ministerio di Enseñansa, den estrecho kolaborashon ku e tim di krísis i Ministerio di Salú, a deliberá ku tur grupo den sektor di enseñansa, pa asina yega na un proposishon pa kontinuá enseñansa pa aña eskolar 2019-2020. Ta delineá protokòlnan nesesario ku mester tene kuenta kuné. Basá riba e proposishonnan i riba konseho i investigashon médiko, a yega na un planifikashon pa adaptá e medidanan den fase, pa por inisiá enseñansa di un forma seif i responsabel.
E promé adaptashon ta pa sentronan pre eskolar (krèsh) por inisiá. Despues lo duna prioridat na gruponan di èksamen pa kuminsá den e siman di 18 di mei. Durante e próksimo 2 pa 3 simannan ta hasi preparashonnan nesesario, pa inisiá enseñansa di fundeshi. Despues e otro gruponan ta sigui.
Sentronan pre eskolar
Mientras ta sigui suavisá e medidanan, mas i mas hende ta haña eksonerashon pa kuminsá traha. Esei ta nifiká mas hende riba kaya ku ta buska kaminda pa hiba nan yunan chikitu. Den konsulta ku tim di ekspertonan médiko, a bin dilanti ku e riesgo di kontagiamentu, serka muchanan di 0 pa 4 aña, ta limitá.
Sentronan ku ta risibí petishon di mayor pa kuida nan yunan i kier habri bèk, por hasi un petishon na Sektor di Kultura i Deporte pa nan kuminsá entrante 4 di mei próksimo. Mayornan ku no tin eksonerashon pa por sali riba kaya tur dia, tambe por hasi uso di e sentronan pre eskolar si nan ta deseá, pero solamente segun nan plachi di dia.
Apertura di e sentronan ta keda organisá den konsulta ku e tim di inspekshon de Sektor di Kultura i Deporte di e Ministerio di Enseñansa, Siensia, Kultura i Deporte (OWCS). Nan por habri solamente si ta kumpli ku e protokòl preskribí pa seguridat i higiena. Sektor di Kultura i Deporte, den koperashon ku diferente instansia, a organisá un tim di inspekshon pa establesé kòntròl rígido riba higiena. E tim akí lo tin identifikashon visíbel.
Gruponan di èksamen i otro tipo di enseñansa
Gruponan di èksamen HAVO 5, VWO 6, VSBO 4 i tur grupo di èksamen final di SBO, por inisiá nan èksamen di skol entrante 18 di mei. Despues ta anunsiá e fecha definitivo pa apertura di enseñansa sekundario i avansá.
Skolnan di fundeshi
Pa skolnan di fundeshi kuminsá, tin yen rekisito ku mester tene kuenta kuné, promé ku skolnan por habri. Ta tuma 2 pa 3 siman pa hasi e preparashonnan nesesario pa adaptá e sistema eskolar i e kontenido di enseñansa. Mester organisá limpiesa profundo i prepará fasilidatnan di higiena den skolnan. Adishonal mester di sosten sosial adekuá ku ta nesesario asina alumnonan inisiá skol atrobe.
Ministerio di Enseñansa, huntu ku Ministerio di Salú, ya kaba a hasi preparashon pa hasi limpiesa profundo i pa instalá mashinnan di habon na skolnan. Tambe ta inventarisá huntu ku skolnan, e estado di bakinan pa laba man i e bañonan.
Pa tur tipo di enseñansa, Ministerio di Salú, huntu ku e departamentu di maneho di Ministerio di Enseñansa, ta desaroyá protokòl i lista di chekeo pa reapertura di skolnan. Di e forma aki kabesnan i direktivanan di skol por evaluá e situashon di e skol, pa garantisá ku ta kumpli ku tur eksigensia pa apertura.
Minister di Enseñansa Sr. Rhuggenaath ta gradisí tur embolbí ku den e último simannan aki a kolaborá pa protehá i sigui eduká nos muchanan, durante di tempunan di reto ku nos pais ta enfrentá relashoná ku Corona vírùs i ta hasi un yamada pa komunidat kompleto kuminsá prepará pa un sistema eskolar otro for di loke nos a kustumbrá ku ne.
